အမျိုးသားရေးသတိဖြင့် ကာကွယ်စောင့်ရှောက်ရမည့် တာဝန်
နိုင်ငံတစ်နိုင်ငံ အတွက် ပြည့်စုံရမည့် အင်္ဂါရပ်များမှာ ပိုင်နက်နယ်မြေ၊ နေထိုင်သည့် လူဦးရေ၊ အုပ်ချုပ်သည့် အစိုးရနှင့် အချုပ်အခြာ အာဏာဟူသော အင်္ဂါရပ်လေးခု ဖြစ်သည်။
ပြည်ထောင်စု သမ္မတ မြန်မာနိုင်ငံတော် သည် အထက်တွင် ဖော်ပြခဲ့သော အင်္ဂါရပ်များ နှင့်ပြည့်စုံသည့် နိုင်ငံဖြစ်ပြီး တိုင်းဒေသကြီး ခုနစ်ခုနှင့် ပြည်နယ် ခုနစ်ပြည်နယ် တို့ကို စုစည်း၍ ပြည်ထောင်စု အဖြစ်ဖွဲ့စည်း ထားသည်။
တိုင်းဒေသကြီး များနှင့် ပြည်နယ်များတွင် ပြည်ထောင်စု နယ်မြေ၊ ကိုယ်ပိုင်အုပ်ချုပ်ခွင့်ရ ဒေသနှင့် ကိုယ်ပိုင် အုပ်ချုပ်ခွင့်ရတိုင်း တို့ပါဝင်သည်။ မြန်မာနိုင်ငံ လူဦးရေနှင့် အိမ်အကြောင်းအရာ သန်းခေါင်စာရင်း အရ ၂ဝ၁၄ ခုနှစ် မတ် ၂၉ ရက်ညတွင် ရှိသော နိုင်ငံတော်၏ လူဦးရေ စုစုပေါင်းမှာ ၅၁ ဒသမ ၄၈ သန်းဖြစ်သည်။ အဆိုပါ လူဦးရေတွင် လုံခြုံရေးနှင့် တခြား အခြေအနေများ ကြောင့် သန်းခေါင်စာရင်း မကောက်ယူ နိုင်သည့် ကချင်ပြည်နယ်၊ ကရင်ပြည်နယ် နှင့် ရခိုင်ပြည်နယ် တို့ရှိ မြို့နယ်များမှ တချို့ဒေသများ၏ ခန့်မှန်းလူဦးရေ ပါဝင်သည်။
သန်းခေါင်စာရင်း အချက်အလက်များ အရ ရန်ကုန်တိုင်း ဒေသကြီးတွင် လူဦးရေ ၇ ဒသမ ၃၆ သန်း၊ ဧရာဝတီတိုင်း ဒေသကြီးတွင် ၆ ဒသမ ၁၈ သန်း၊ မန္တလေးတိုင်း ဒေသကြီးတွင် ၆ ဒသမ ၁၆ သန်း၊ ရှမ်းပြည်နယ် တွင် ၅ ဒသမ ၈၂ သန်း၊ စစ်ကိုင်းတိုင်း ဒေသကြီးတွင် ၅ ဒသမ ၃၂ သန်း နေထိုင်လျက် ရှိသည်။
လူဦးရေ အနည်းဆုံး နေထိုင်သော တိုင်းဒေသကြီးနှင့် ပြည်နယ်များမှာ ကယားပြည်နယ် တွင် သုည ဒသမ ၈၂ သန်း၊ ချင်းပြည်နယ်တွင် သုည ဒသမ ၄၇ သန်း၊ ကရင်ပြည်နယ် တွင် ၁ ဒသမ ၅၇ သန်း၊ တနင်္သာရီတိုင်း ဒေသကြီးတွင် ၁ ဒသမ ၄ဝ သန်းနှင့် နေပြည်တော် ကောင်စီနယ်မြေ တွင် ၁ ဒသမ ၁၆ သန်း နေထိုင်လျက် ရှိသည်။
တိုင်းဒေသကြီးများနှင့် ပြည်နယ်များ စတုရန်း ၁ ကီလိုမီတာ အတွင်း နေထိုင်လျက် ရှိသော လူဦးရေ သိပ်သည်းဆမှာ ရန်ကုန်တိုင်း ဒေသကြီး ၇၁၆ ဦး၊ မန္တလေးတိုင်း ဒေသကြီး ၂ဝဝ ဦး၊ ဧရာဝတီတိုင်း ဒေသကြီး ၁၇၇ ဦး၊ မွန်ပြည်နယ် ၁၆၇ ဦး၊ နေပြည်တော် ကောင်စီ နယ်မြေ ၁၆၄ ဦး၊ ပဲခူးတိုင်း ဒေသကြီး ၁၂၄ ဦး၊ မကွေးတိုင်း ဒေသကြီးနှင့် ရခိုင်ပြည်နယ် တို့တွင် ၈၇ ဦးစီ၊ စစ်ကိုင်းတိုင်း ဒေသကြီး ၅၇ ဦး၊ ကရင်ပြည်နယ် ၅၂ ဦး၊ ရှမ်းပြည်နယ် ၃၇ ဦး၊ တနင်္သာရီတိုင်း ဒေသကြီး ၃၂ ဦး၊ ကယားပြည်နယ် ၂၄ ဦး၊ ကချင်ပြည်နယ် ၁၉ ဦး၊ ချင်းပြည်နယ် ၁၃ ဦး အသီးသီး နေထိုင်လျက် ရှိကြသည်။
မြန်မာနိုင်ငံ တည်နေရာသည် လူဦးရေသန်းပေါင်း တစ်ထောင် ကျော်သော နိုင်ငံကြီး နှစ်ခုနှင့် လည်းကောင်း၊ လူဦးရေ ပေါက်ကွဲမှုနှုန်း မြင့်မားသော အိမ်နီးချင်း နိုင်ငံနှင့် လည်းကောင်း နယ်နိမိတ်ချင်း ထိစပ်လျက် ရှိနေသည်။
ထိုသို့ ရှိနေခြင်းကြောင့် လူဦးရေ သိပ်သည်းမှု နည်းပါးသော တိုင်းဒေသကြီး များနှင့် ပြည်နယ်များ အတွင်းသို့ လူဦးရေ သိပ်သည်းမှု များသော အိမ်နီးချင်း နိုင်ငံများမှ နိုင်ငံသားများ တရားမဝင် လာရောက် အခြေချ နေထိုင်သည့် ပြဿနာများကို ထိရောက်စွာ တားဆီးနိုင်ရန် လိုသည်။
ကမ္ဘာပြုမှု ဖြစ်စဉ်များအရ ကမ္ဘာ့ရွာကြီးတွင် စီးပွားရေးနှင့် လူမှုရေး နယ်ပယ်မှ သူလျှိုလုပ်ငန်း လုပ်သည့်ကိစ္စများ၊ ရွှေ့ပြောင်း ဒုက္ခသည်များ အတွင်း ရောနှောလိုက်ပါ လာသော အကြမ်းဖက် သမားများကိစ္စ တို့ဖြင့် ရှုပ်ထွေးလျက် ရှိကြောင်း တွေ့နေရပေရာ နိုင်ငံတစ်နိုင်ငံ၏ အင်္ဂါရပ်များ အားကောင်း မောင်းသန် ကြံ့ခိုင်စေရန် တိုင်းရင်းသား ပြည်သူ တစ်ရပ်လုံးက အမျိုးသားရေး သတိဖြင့် နိုးကြားစွာ ကာကွယ် စောင့်ရှောက်ကြ ပါရန် မြဝတီက တိုက်တွန်းနှိုးဆော် လိုက်ရပါသည်။
(အယ်ဒီတာ့အာဘော်)
No comments:
Post a Comment