ရွာငံ ၊ ၁၈-၆-၂၀၁၅
ဇွန် ၁ ရက်တွင် ယဉ်ကျေးမှု တက္ကသိုလ် နိုင်ငံတကာ အနုပညာ သမိုင်းဘာသာရပ် သင်ကြားခဲ့ ဖူးသော ဆရာ ဦးစိုးမိုးနိုင် ၏ ပြောကြားချက် အရ ရှမ်းပြည်နယ် (တောင်ပိုင်း) ရွာငံမြို့နယ် ပိုင် မြစ်သားနယ်စပ် ဝမ်းတွင်းမြို့နယ် အရှေ့ဘက် တောင်ကြောတွင် နောက်ထပ် ပြဒါးလင်းဂူ အသစ်တစ်ခု ထပ်မံတွေ့ရှိ ခဲ့ပြီဖြစ်ကြောင်း သိရသည်။
အဆိုပါ ဂူအသစ်ကို မြစ်သားမြို့နယ် မိုင်းမော ကျေးရွာအုပ်စု တောတွင်းရွာမှ ကိုဝင်းဘို က ထပ်မံ တွေ့ရှိခဲ့ခြင်း ဖြစ်ကြောင်း သိရသည်။
အံ့သြဖွယ် ကောင်းသော လက်ဝါးပုံ ကျောက်နံရံ ပန်းချီ ထပ်မံ တွေ့ရှိခဲ့ကြောင်း၊ အမှတ်(၁) ပြဒါးလင်းဂူ ကဲ့သို့ ပုစွန်လုံးပုံ၊ လိပ်ပုံ၊ လှံပုံနှင့် ဆင်ရုပ်ကြီးပုံ တို့ကို တွေ့ရှိခဲ့ ရကြောင်း၊ ဆင်ရုပ်ပုံ၏ နှာမောင်း၊ နားရွက်တို့မှာ အထူး ထင်ရှားကြောင်း၊ ဆွဲသားပုံမှာ မျဉ်းတစ်ကြောင်း တည်း မဟုတ်ဘဲ နှစ်ကြောင်း ထပ်ဆွဲထားခြင်း ဖြစ်ကြောင်း၊ ရှေးဟောင်း သုတေသန ဦးစီးဌာနသို့ လည်း သတင်းပို့ ထားကြောင်း ကိုဝင်းဘို က ပြောပြ၍ သိရသည်။
''ဒီလို ပြဒါးလင်းဂူမျိုး က နှစ် လုံးတည်း ရှိတာမဟုတ်ပါဘူး။ သေးသေးမွှားမွှား လေးတွေလဲ ရှိပါတယ်။ ဒါကြောင့် ပြဒါးလင်းဂူစု လို့ မြစ်သားမြို့နယ် မှတ်တမ်းမှာ ရေးထားတာ ဖြစ်တယ် ။ ဒီနယ်မှာ သမိုင်းခြေရာ တွေကတော့ ရှာဖွေလေ တွေ့ရှိလေ ပေါ့ဗျာ '' ဟု ဒေသခံ တစ်ဦးက ပြောကြား ခဲ့ကြောင်း သိရသည်။
ရွှေရည်ဦး (မြစ်သား)
#Yadanarpondaily
No comments:
Post a Comment