စစ်ကိုင်း ၊ ၅-၂-၂၀၁၅
ရှေးဟောင်း ယဉ်ကျေးမှု နယ်မြေဖြစ်သည့် စစ်ကိုင်းမြို့နယ် မင်းကွန်းဒေသ ဧရာဝတီ မြစ်ကမ်းပါး ပြိုကျရာမှ ပေါ်ထွက်လာသည့် လှေကြီးကို မင်းကွန်း လေးဌာန ဆရာတော် ကြီးများ ဦးဆောင်၍ ဇန်နဝါရီ ၂၉ ရက်က စတင်ဆယ်ယူ ခဲ့ရာ ယမန်နေ့ မွန်းတည့် ၁၂ နာရီခန့်က ကမ်းစပ် နေရာသို့ တစ်စီးလုံး ဖော်၍ သယ်ယူ လာနိုင်ပြီ ဖြစ်ကြောင်း သိရသည်။
အဆိုပါ လှေကြီးမှာ အရှည် ၇၈ ပေ၊ အကျယ် ရှစ်ပေ လေးလက်မ၊ ဇောက် နှစ်ပေ ၁ဝ လက်မရှိပြီး သစ်တစ်လုံး တည်း ထွင်းထားသည့် ထွင်းလှေ အမျိုးအစား ဖြစ်ကြောင်း၊ ကမ်းစပ်ရေထဲ မှ ကုန်းပေါ်သို့ တင်၍ ပြသသွားရန် စီစဉ်ထားကြောင်း၊ ကမ်းပေါ် ရောက်ပါက မင်းကွန်း ခြင်္သေ့ကြီးများ ရှိသည့် ကမ်းနဖူးတွင် ပြသထားရန် စီစဉ်ထားကြောင်း ညောင်ပင်သာ ဆရာတော် ထံမှ သိရသည်။
ထို သစ်လုံးထွင်း လှေကြီးနှင့် အတူ လှေနံလှေဝမ်း ကိုထိန်းသည့် အရှည်ပေ ၅ဝ ခန့်ရှိသော တံကူကြီး လေးခုကိုလည်း ဆယ်ယူရရှိ ခဲ့ပြီး စတင် ဖော်ယူသည့် ဇန်နဝါရီ ၂၉ ရက်မှ ယမန်နေ့ အထိ ကုန်ကျစရိတ်မှာ ငွေကျပ် ၁၂ သိန်းခန့် ကုန်ကျခဲ့ပြီး လူအင်အား ၁၃ ဦးဖြင့် လုပ်ဆောင်ခဲ့ကြောင်း၊ လှေကြီး ထားမည့်နေရာ ရောက်ရှိရေး အတွက် ယန္တရား စက်များဖြင့် ဆောင်ရွက် သွားမည် ဖြစ်ကြောင်း လှေကြီး ဖော်ယူရေး ဆောင်ရွက် ခဲ့သည့် အလုပ်သမား ခေါင်းဆောင် ဦးသိန်းဝင်း က ပြောပြသည်။
''အခု ဖော်လိုက်တဲ့ လှေကြီးက လွန်ခဲ့တဲ့ ၄၅ နှစ်ကျော် ကတည်းက ဒီနေရာမှာ သစ်ငုတ်ကြီး လိုရှိနေတာပါ။ တစ်ရွာလုံးက သစ်ငုတ်ကြီးပဲ ထင်နေကြတာပါ။ အခု ကမ်းပါးပြိုကျ မှ လှေမှန်း သိရတာပါ။ ရှေးဘိုးဘွားတွေ အဆက်ဆက် ပြောတာကြားဖူး တာတော့ မင်းကွန်း ခေါင်းလောင်းကြီးကို နန်းတော်ကျွန်း (ဧရာဝတီ မြစ်လယ်မှကျွန်း) မှာသွန်းတော့ လှေပေါ်မှာ ဖောင်ဖွဲ့၊ ဖောင်ပေါ်မှာ ခေါင်းလောင်းကြီး မိုကို ပြုလုပ်ပြီး အပြီးသွန်းလုပ် ခဲ့တာပါ။ ခေါင်းလောင်းကြီး ပြီးတော့ ကျွန်းပေါ်က အခု ခေါင်းလောင်းရှိတဲ့ နေရာထိ မြောင်းတူးပြီး ဧရာဝတီမြစ်ထဲ ဆွဲယူတယ်။ အဲဒီလိုဆွဲပြီး မင်းကွန်း ဆိပ်ကမ်း ရောက်တော့ အခု ခေါင်းလောင်း ချိတ်တဲ့ နေရာမှာ အုတ်တိုင်နဲ့ ချိတ်စင်လုပ်ထားပြီး အဲ့ဒီနေရာကို ခေါင်းလောင်းဖောင် ရောက်အောင် ဆွဲယူပါတယ်။ ခေါင်းလောင်း ချိတ်ပြီးတဲ့ အခါ မြစ်ဘက်က မြောင်းဝကို ပိတ်ပြီး ရေနုတ်လိုက်တော့ ခေါင်းလောင်း ကချိတ်ပြီး ဖြစ်သွားတယ်။ မြောင်းကို မြေဖို့တဲ့အခါ ခေါင်းလောင်း တင်တဲ့ လှေဖောင်လဲ မြေဖို့တဲ့ အထဲမှာ ရောဖို့ လိုက်တယ်လို့ ကြားဖူးပါတယ်။ အခု ဘိုးဘွားတွေ ပြောတဲ့စကား မှန်သလို ဖြစ်နေပြီ .. '' ဟု ဒေသခံ အသက် ၆၇ နှစ်ရှိ အဘွား ဒေါ်အေးမ က ပြောပြသည်။
အဆိုပါ လှေကြီးကို ယခု ဖော်ယူထား ရှိသည့် စက်တော်ရာ ဘုရား ဆိပ်ကမ်းမှ ဆွဲတင်၍ အများပြည်သူ ကြည့်ရှုလေ့လာ နိုင်ရန် ပြသမည့် နေရာသို့ ပြောင်းရွှေ့ရေးကို မင်းကွန်း လေးဌာန ဆရာတော်ကြီးများ ဦးဆောင်ကာ ကျေးရွာ အုပ်ချုပ်ရေး တာဝန်ရှိသူများ ညှိနှိုင်းဆွေးနွေး ဆောင်ရွက် သွားမည် ဖြစ်ကြောင်း ညောင်ပင်သာ ဆရာတော်၏ မိန့်ကြားချက် အရ သိရသည်။ (၁၇၄)
#Yadanarpondaily
#ရတနာပုံနေ့စဉ်
No comments:
Post a Comment