ဆန်ဖြူများထက် ပိုမို အစားခံသော မြန်မာပေါင်းဆန် ကို EU နိုင်ငံများတွင် ဈေးကွက် နေရာရလာ

ရန်ကုန် ၊ ၃၁-၁၀-၂၀၁၃

ရုရှားနိုင်ငံမှ မြန်မာ့ ပေါင်းဆန်များကို ဝယ်ယူစားသုံး သည့်နည်းတူ အီးယူနိုင်ငံ များမှလည်း မြန်မာ့ပေါင်းဆန် များကို ဝယ်ယူ လာကြသဖြင့် ယခုအခါ အဆိုပါ နိုင်ငံများသို့ မြန်မာ့ ပေါင်းဆန်များ ကို ပိုမိုတင်ပို့ လာရကြောင်း စီးပွားရေးနှင့် ကူးသန်း ရောင်းဝယ်ရေး ဝန်ကြီးဌာနမှ တာဝန်ရှိသူ တစ်ဦး ၏ ပြောကြားချက် အရ သိရသည်။

မကြာသေးမီက ရုရှားနိုင်ငံမှ မှာယူသဖြင့် ပေါင်းဆန် တန်ချိန် ၁၅ဝဝ ကို တင်ပို့ပြီးသည့် နောက်ပိုင်းတွင် ယခုကဲ့သို့ EU နိုင်ငံများ မှလည်း မှာယူလာ ကြသည်မှာ မြန်မာ့ ပေါင်းဆန် များသည် အီးယူ နိုင်ငံများတွင် နာမည်ကောင်း ရရှိလာသည့် နည်းတူ ဈေးကွက် နေရာ များလည်း ရရှိလာခြင်း ပင်ဖြစ်ကြောင်း ၄င်းက ဆက်လက် ပြောကြား ခဲ့သည်။

ယခု အောက်တိုဘာ လလယ်ပိုင်း နှင့် လကုန်ပိုင်း၌ ပင် Golden Lace company, May Yu Marine company နှင့် Shwe Wah Yaung company တို့မှ စပိန် ၊ နယ်သာလန် ၊ ပိုလန် ၊ ခရိုအေးရှား အစရှိသောနိုင်ငံများသို့ ဧည့်မထ ငါးမှတ် ပေါင်းဆန် ၊ ဇီယာ ငါးမှတ်ပေါင်း ဆန်နှင့် ပေါင်းဆန် ဆန်ကွဲ B (2, 3,4 ) စုစုပေါင်းတန်ချိန် ၈၅ဝ နီးပါးကို တင်ပို့ နိုင်ခဲ့ပြီး စက်တင်ဘာလ နောက်ဆုံးပတ် အတွင်း ကလည်း Golden Lace company နှင့် Bamar Commodity Trading Company တို့မှ စပိန်နိုင်ငံ သို့ ဧည့်မထ ငါးမှတ် ပေါင်းဆန် စုစုပေါင်း တန်ချိန် ၁၁၂၅ တန် တင်ပို့ နိုင်ခဲ့သည်။

အီးယူနိုင်ငံ များ၏ ရာသီဥတု အနေအထား အရ မြန်မာ့ ပေါင်းဆန်များကို စားသုံးခြင်းသည် ကျန်းမာရေး အရ သင့်တော်မှု ရှိခြင်း ၊ မြန်မာ့ပေါင်းဆန် သည် အဆိုပါ နိုင်ငံများတွင် စားနပ် ရိက္ခာအဖြစ် အသုံးပြုနေသော ဆန်ဖြူများထက် ပိုမို အစားခံခြင်း ၊ တခြားနိုင်ငံ များထက် မြန်မာနိုင်ငံ မှ ဆန်များ မှာယူရာတွင် သွင်းကုန် အခွန် ကင်းလွတ်ခွင့် ရရှိခြင်း စသော အကျိုးကျေးဇူး များကြောင့် မြန်မာ့ပေါင်းဆန် များကို ဝယ်ယူ အားပေး လာကြခြင်း ဖြစ်သည်။

ယခုနှစ်အတွင်း ကျန်ရှိနေသေး သောလများ တွင်လည်း အီးယူ နိုင်ငံများသို့ မြန်မာ့ပေါင်းဆန် များကို နောက်ထပ် တင်ပို့နိုင် ရန် အလားအလာများ ရှိနေသေးကြောင်း သိရှိရသည်။