-
နေပြည်တော်၊ ဇန်န၀ါရီ - ၂၈
-
တပ်မတော်သားများ၏ အားကစားစွမ်းရည် မြှင့်တင်ရေးနှင့် နိုင်ငံဂုဏ်ဆောင် တပ်မတော်သား အားကစားသမားများ ပေါ်ထွက်လာစေရေးအတွက် တပ်မတော်(ကြည်း၊ရေ၊လေ) အားကစား ပြိုင်ပွဲများအား နှစ်စဉ်ကျင်းပ ပြုလုပ်လျက်ရှိရာ ၂၀၁၈ - ၂၀၁၉ ခုနှစ်တပ်မတော် ကာကွယ်ရေး ဦးစီးချုပ်ဖလား၊ တပ်မတော်(ကြည်း၊ရေ၊လေ) ဘောလုံးပြိုင်ပွဲ ဗိုလ်လုပွဲနှင့် အားကစားပြိုင်ပွဲဆုချီးမြှင့်ခြင်း အခမ်းအနားအား ယနေ့မွန်းလွဲပိုင်းတွင် နေပြည်တော်ရှိ ဇေယျာသီရိ တပ်မတော် အားကစားကွင်း၌ ကျင်းပပြုလုပ်ရာ တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီးမင်းအောင်လှိုင် တက်ရောက်ကြည့်ရှု အားပေးပြီး ဆုတံဆိပ်များ ပေးအပ်ချီးမြှင့်သည်။
-
အဆိုပါ ဘောလုံးပြိုင်ပွဲဗိုလ်လုပွဲနှင့် ဆုချီးမြှင့်ခြင်း အခမ်းအနားသို့ တပ်မတော် ကာကွယ်ရေးဦးစီးချုပ်နှင့် အတူဇနီး ဒေါ်ကြူကြူလှ ၊ ဒုတိယတပ်မတော် ကာကွယ်ရေး ဦးစီးချုပ်ကာကွယ်ရေးဦးစီးချုပ်(ကြည်း) ဒုတိယဗိုလ်ချုပ်မှူးကြီး စိုးဝင်းနှင့်ဇနီး ၊ ပြည်ထောင်စုဝန်ကြီးများ ဖြစ်ကြသည့် ဒုတိယဗိုလ်ချုပ်ကြီး ကျော်ဆွေနှင့် ဇနီး၊ ဒုတိယဗိုလ်ချုပ်ကြီး စိန်ဝင်း၊ ဒုတိယဗိုလ်ချုပ်ကြီး ရဲအောင်နှင့်ဇနီး၊ ညှိနှိုင်းကွပ်ကဲရေးမှူး (ကြည်း၊ရေ၊လေ) ဗိုလ်ချုပ်ကြီး မြထွန်းဦးနှင့်ဇနီး၊ ကာကွယ်ရေးဦးစီးချုပ်ရုံးမှ တပ်မတော် အရာရှိကြီးများနှင့်ဇနီးများ၊ နေပြည်တော်တိုင်းစစ်ဌာနချုပ်တိုင်းမှူး၊ နိုင်ငံတော် ကာကွယ်ရေး တက္ကသိုလ်မှ သင်တန်းသား အရာရှိကြီးများ ၊ကာကွယ်ရေးဦးစီးချုပ်ရုံး (ကြည်း၊ရေ၊လေ) ရုံး/ဌာနအသီးသီးမှ အရာရှိ၊ စစ်သည်၊ မိသားစုများ၊ နေပြည်တော်တိုင်း စစ်ဌာနချုပ် ကွပ်ကဲမှုအောက်ရှိ တပ်နယ်များမှအရာရှိ၊ စစ်သည်၊ မိသားစုများ၊ ဖိတ်ကြားထားသည့် ဧည့်သည်တော်များ တက်ရောက်ကြသည်။
-
တပ်မတော်(ကြည်း၊ရေ၊လေ) ဘောလုံးပြိုင်ပွဲ (က)အဆင့် ဗိုလ်လုပွဲတွင် အလယ်ပိုင်းတိုင်း စစ်ဌာနချုပ်အသင်းနှင့် ကာကွယ်ရေးဦးစီးချုပ်ရုံး(ကြည်း) စခန်းမှူးရုံး အသင်းတို့ ယှဉ်ပြိုင်ကစားကြရာတပ်မတော်ကာကွယ်ရေး ဦးစီးချုပ် ဗိုလ်ချုပ်မှူးကြီး မင်းအောင်လှိုင်နှင့်အတူ အခမ်းအနားသို့ တက်ရောက်လာကြသူများက ကြည့်ရှုအား ပေးကြသည်။
-
-
ပြိုင်ပွဲတွင် တစ်ဖက်နှင့်တစ်ဖက် အကြိတ်အနယ် ယှဉ်ပြိုင်ကစားခဲ့ကြကာ ပထမပိုင်းတွင် ကာကွယ်ရေး ဦးစီးချုပ်ရုံး(ကြည်း)စခန်းမှူးရုံး အသင်းက တစ်ဂိုး ဂိုးမရှိဖြင့် ဦးဆောင် ကစားခဲ့ပြီးဒုတိယပိုင်း ပွဲပြီးဆုံးခါနီးအချိန်တွင် နှစ်ဂိုးထပ်မံသွင်းယူ၍ အလယ်ပိုင်းတိုင်း စစ်ဌာနချုပ် အသင်းအား သုံးဂိုး ဂိုးမရှိဖြင့် အနိုင်ရရှိသွားသည်။
-
ယင်းနောက် ဆုချီးမြှင့်ခြင်း အခမ်းအနားကို ကျင်းပပြုလုပ်ရာ တပ်မတော် (ကြည်း၊ရေ၊လေ) စစ်တီးဝိုင်းအဖွဲ့က ကွင်းအတွင်း ၀င်ရောက်နေရာယူပြီး စစ်ရေးပြမှူးကြီး ဦးဆောင်သော အလံတော်အဖွဲ့နှင့် အားကစားအသင်း ၁၇ သင်းမှ အားကစားသမားများ နေရာယူကြသည်။ ထို့နောက်တပ်မတော် (ကြည်း၊ရေ၊လေ) ဘောလုံးပြိုင်ပွဲတွင် (ခ)အဆင့် ပြိုင်ပွဲနှင့် (က)အဆင့်ပြိုင်ပွဲတွင် အသန့်ရှင်းဆုံး ဆုရရှိသော အသင်းတို့အား တပ်မတော် အားကစား နှင့် ကာယပညာအုပ်ချုပ်ရေးအဖွဲ့ ဥက္ကဋ္ဌ၊ စစ်ရေးချုပ် ဒုတိယဗိုလ်ချုပ်ကြီး ဆန်းဦးက လည်းကောင်း၊ (ခ) အဆင့်နှင့် (က)အဆင့်ပြိုင်ပွဲတွင် တတိယဆုရရှိသော အသင်းတို့အား ကာကွယ်ရေးဦးစီးချုပ်(လေ) ဗိုလ်ချုပ်ကြီး မောင်မောင်ကျော်က လည်းကောင်း၊(ခ)အဆင့်နှင့် (က)အဆင့် ပြိုင်ပွဲတွင် ဒုတိယဆုရရှိသော အသင်းတို့အား ကာကွယ်ရေး ဦးစီးချုပ်(ရေ) ဗိုလ်ချုပ်ကြီး တင်အောင်စန်းက လည်းကောင်း၊ (က)အဆင့်နှင့် (ခ)အဆင့်ပြိုင်ပွဲများတွင် နေရာအလိုက် အကောင်းဆုံးဆုရရှိသူများအား ညှိနှိုင်းကွပ်ကဲရေးမှူး (ကြည်း၊ရေ၊လေ) ဗိုလ်ချုပ်ကြီးမြထွန်းဦးက လည်းကောင်း၊ (ခ)အဆင့် ပထမဆုရရှိသည့် ကမ်းရိုးတန်းဒေသတိုင်း စစ်ဌာနချုပ်(ဃ) ကိုယ်စားပြုအသင်းမှအားကစားသမားများအား ပြည်ထောင်စုဝန်ကြီး ဒုတိယဗိုလ်ချုပ်ကြီး ရဲအောင်က လည်းကောင်း၊ (က)အဆင့် ပထမဆုရရှိသော ကာကွယ်ရေးဦးစီးချုပ်ရုံး(ကြည်း) စခန်းမှူးရုံးအသင်းမှအားကစားသမားများ အား ပြည်ထောင်စုဝန်ကြီး ဒုတိယဗိုလ်ချုပ်ကြီး စိန်ဝင်းက လည်းကောင်း ဆုများအသီးသီး ပေးအပ်ချီးမြှင့်ကြသည်။
-
-
ထို့နောက် (ခ)အဆင့်ပထမဆုရရှိသည့် ကမ်းရိုးတန်းဒေသတိုင်း စစ်ဌာနချုပ်(ဃ) ကိုယ်စားပြုအသင်းအား ပြည်ထောင်စုဝန်ကြီး ဒုတိယဗိုလ်ချုပ်ကြီး ကျော်ဆွေက တံခွန်စိုက် ဖလား၊ ဆင့်ပွားဖလားနှင့် ငွေသားဆုများကို လည်းကောင်း၊ (က)အဆင့် ပထမဆုရရှိသော ကာကွယ်ရေးဦးစီးချုပ်ရုံး(ကြည်း) စခန်းမှူးရုံးအသင်းအား ဒုတိယတပ်မတော် ကာကွယ်ရေးဦးစီးချုပ်ကာကွယ်ရေးဦးစီးချုပ် (ကြည်း) ဒုတိယဗိုလ်ချုပ်မှူးကြီး စိုးဝင်းက တံခွန်စိုက်ဖလား၊ ဆင့်ပွားဖလားနှင့် ငွေသားဆုများကိုလည်းကောင်း အသီးသီး ပေးအပ်ချီးမြှင့်ကြသည်။
-
-
ဆက်လက်ပြီး တပ်မတော်ကာကွယ်ရေး ဦးစီးချုပ် ဗိုလ်ချုပ်မှူးကြီး မင်းအောင်လှိုင်က ၂၀၁၈-၂၀၁၉ ခုနှစ်၊ တပ်မတော်(ကြည်း၊ရေ၊လေ) အားကစားပြိုင်ပွဲများတွင် ရွှေတံဆိပ် ၁၁၉ ခု၊ ငွေတံဆိပ်၇၂ ခု၊ ကြေးတံဆိပ် ၆၁ ခု စုစုပေါင်း ၂၅၂ ဆုဖြင့် ဆုတံဆိပ် အများဆုံး ရရှိသော ကာကွယ်ရေးဦးစီးချုပ်ရုံး(ရေ) ကိုယ်စားပြုအသင်းအား တပ်မတော် ကာကွယ်ရေး ဦးစီးချုပ်၏ တံခွန်စိုက်ဒိုင်းဆုနှင့် ငွေသားဆုများအား ပေးအပ် ချီးမြှင့်သည်။
-
ဆုချီးမြှင့်ပွဲအခမ်းအနားအပြီးတွင်စစ်ရေးပြမှူးကြီးဦးဆောင်သောအားကစားအသင်း ၁၇ သင်းမှ အားကစားသမားများက ကွင်းအတွင်းမှ ပြန်လည်ထွက်ခွာကြရာ တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်နှင့် တက်ရောက်လာကြသူများက ရင်းရင်းနှီးနှီး နှုတ်ဆက်ကြပြီး တပ်မတော်(ကြည်း၊ရေ၊လေ) အားကစားပြိုင်ပွဲအား ရောင်စုံမီးရှူး မီးပန်းများ ပစ်ဖောက်၍ အောင်မြင်စွာ ကျင်းပပြီးစီးခဲ့သည်။
-
၂၀၁၈-၂၀၁၉ ခုနှစ် တပ်မတော်(ကြည်း၊ရေ၊လေ) အားကစားပြိုင်ပွဲအား ဘောလုံးပြိုင်ပွဲ၊ လက်ဝှေ့ပြိုင်ပွဲ၊ ပိုက်ကျော်ခြင်းပြိုင်ပွဲ၊ ပြေးခုန်ပစ်(ကျား/မ)ပြိုင်ပွဲ၊ မသန်စွမ်း အားကစားပြိုင်ပွဲ၊ ခြင်းလုံးပြိုင်ပွဲ၊ ဘော်လီဘော (ကျား/မ)ပြိုင်ပွဲ၊ ဂျူဒို(ကျား/မ)ပြိုင်ပွဲ၊ ရေကူးပြိုင်ပွဲ၊ အလေးမနှင့် ကာယဗလပြိုင်ပွဲ၊ ၀ူရှူးပြိုင်ပွဲ၊ ကရာတေးဒိုပြိုင်ပွဲ၊မြန်မာ့သိုင်းပြိုင်ပွဲနှင့် တိုက်ကွမ်ဒိုပြိုင်ပွဲစသည့် အားကစားပြိုင်ပွဲ ၁၄ မျိုး ကျင်းပပြုလုပ်ခဲ့ခြင်း ဖြစ်ကြောင်း သတင်းရရှိသည်။
-
#မြ၀တီနေ့စဉ်သတင်းစာ
No comments:
Post a Comment