-
ရန်ကုန် ဒီဇင်ဘာ ၂၆
-
တိုင်းဒေသကြီးနှင့် ပြည်နယ်အသီးသီး၌ ထပ်မံဖော်ဆောင်မည့် ဟိုတယ်အဆောက်အအုံများ၊ ဈေးဝယ်စင်တာများနှင့် ခရီးသွားဒေသများ၌ မသန်စွမ်းသူများ လွယ်ကူစွာ အသုံးပြု သွားလာနိုင်စေရန် လိုအပ်ချက်များအတွက် သက်ဆိုင်ရာ တိုင်းဒေသကြီးနှင့် ပြည်နယ်အစိုးရအဖွဲ့များ ညှိနှိုင်းကာ ခွင့်ပြုချက် ရယူဆောင်ရွက်မည်ဖြစ်ကြောင်း ရန်ကုန် မြို့ အလုံလမ်းရှိ Summit Parkview ဟိုတယ်၌ ယနေ့တွင် ကျင်းပသည့် ဟိုတယ်နှင့် ခရီးသွားလာမှုများတွင် မသန်စွမ်းသူများ လွယ်ကူစွာ အသုံးပြုနိုင်ရေးဆိုင်ရာ ဆွေးနွေးပွဲမှ သိရသည်။
-
''ဒီနေ့အစည်းအဝေးက ဟိုတယ်နဲ့ခရီးသွားလာရေး ကဏ္ဍမှာ မသန်စွမ်းသူတွေ ခရီးသွားလာရာမှာ လွယ်ကူအဆင်ပြေစေဖို့ အဓိကဦးစားပေး ဆွေးနွေးပါတယ်။ ဟိုတယ် နဲ့ခရီးသွားလာရေး ကဏ္ဍမှာတိုင်းဒေသကြီးနဲ့ ပြည်နယ်အလိုက် ဒေသဆိုင်ရာ ကော်မတီ တွေဖွဲ့စည်းပြီး ဟိုတယ်တွေ စပြီးဆောက်လုပ်ရင် မသန်စွမ်းသူတွေ သွားလာမှုအဆင် ပြေအောင် အသုံးပြုနိုင်မယ့် လမ်းတွေ၊ အဆင့်မြင့်အဆောက်အအုံတွေနဲ့ တန်ခိုးကြီး ဘုရားတွေမှာ မသန်စွမ်းသူတွေ သွားလာနိုင်မယ့် လမ်းကြောင်းတွေကို အသစ်လုပ်မယ်။ ရှိပြီးသားတွေကို ပိုမိုကောင်းမွန်အောင် ဆောင်ရွက်ပေးဖို့နဲ့ မရှိသေးဘူးဆိုရင် ဖြည့်စွက်ဆောင်ရွက်မယ်။နောက်ထပ် ဆောက်လုပ်မယ့် ဟိုတယ်တွေကိုလည်း မသန်စွမ်းသူတွေ အသုံးပြုနိုင်တဲ့ သတ်မှတ်ချက်နဲ့အညီ သက်ဆိုင်ရာ တိုင်းဒေသကြီး အစိုးရအဖွဲ့က ခွင့်ပြုပေးဖို့ ဆောင်ရွက်ပါမယ်'' ဟု ရန်ကုန်တိုင်းဒေသကြီး ဟိုတယ်နှင့်ခရီး သွားညွှန်ကြားမှုဦးစီးဌာန ညွှန်ကြားရေးမှူး ဦးနိုင်ဝင်းကပြောသည်။
-
အဆိုပါဆွေးနွေးပွဲ၌ မသန်စွမ်းသူများ အပေါ်ရှုမြင်နေသော ပုံစံများ၊ အတွေးအမြင်များ၊ လူသားဆန်သော အမြင်၊ ဟိုတယ်နှင့် ခရီးသွားလာရေး ကဏ္ဍကို ဖော်ဆောင်ရာတွင် မသန်စွမ်းသူများ၊ ကိုယ်ဝန်ဆောင်မိခင်များ၊ သက်ကြီးရွယ်အိုများအတွက် ထည့်သွင်း ဆောင်ရွက်ပေးမည့် အခြေအနေများ၊ ကမ္ဘာ့နိုင်ငံများနှင့် အိမ်နီးချင်း နိုင်ငံများ၌ မသန် စွမ်းသူများ အဆင်ပြေစေရေး အတွက် ဖော်ဆောင်မှုများကို စံပြအဖြစ်ထည့်သွင်းဆွေးနွေးခြင်း၊ ဟိုတယ်နှင့်ခရီးသွားကဏ္ဍ ဖော်ဆောင်ရာတွင် မသန်စွမ်းသူများအတွက် မူဝါဒများ ထည့်သွင်းမည့် အခြေအနေများကို တာဝန်ရှိသူများက တက်ရောက်ဆွေးနွေးကြသည်။ နိုင်ငံတကာ၌မသန်စွမ်းသူများ၏ အရေးကို အသိအမှတ် ပြုထားသကဲ့သို့ မြန်မာနိုင်ငံ၌လည်း မသန်စွမ်းသူများ၏အရေးကို ဥပဒေပြုရေးဆွဲပြီး အသိအမှတ်ပြုထားသည်။
-
အိမ်နီးချင်း နိုင်ငံဖြစ်သော တရုတ်နိုင်ငံ သည် မသန်စွမ်းသူများ သွားလာနိုင်စေရန် ပလက်ဖောင်းများ၊ ဈေးဝယ်စင်တာများ၊ ဟိုတယ်များ၌ လျှောက်လမ်းများ စီမံထားသော်လည်း မြန်မာနိုင်ငံအနေဖြင့် နိုင်ငံတကာအဆင့်မီ အဆင့်မြင့် ဟိုတယ်ကြီးများ၊ ဈေးဝယ်စင်တာ များနှင့် အထင်ကရနေရာများ၌ မသန်စွမ်းသူများ သွားလာရာတွင် အဆင်ပြေရန် ဆောင်ရွက် ထားသော်လည်း တချို့ဟိုတယ်နှင့်ခရီးသွားကဏ္ဍများတွင် ဆောင်ရွက်ဆဲ ဖြစ်ကြောင်း သိရသည်။
-
#မြ၀တီနေ့စဉ်သတင်းစာ
No comments:
Post a Comment