ဟိမဝန္တာမှ ထွက်ရှိသည့် ပန်းရောင်ဆားကို ပြည်တွင်း၌ ထုတ်လုပ်သုံးစွဲလာ

ရန်ကုန် အောက်တိုဘာ ၂

-

အိန္ဒိယ၊ နီပေါ၊ ပါကစ္စတန်နှင့် ဟိမဝန္တာတောင်တန်းတို့မှ ထွက်ရှိသည့် ပန်းရောင်ကျောက် (Pink Rock) မှ ပြုလုပ်ထားသည့် ပန်းရောင်ဆား (Pink Himalayan Salt) ကို ပြည်တွင်း၌ ထုတ်လုပ်နေပြီ ဖြစ်သောကြောင့် ယခင်ကထက် သုံးစွဲမှုများလာကြောင်း ရန်ကုန်တိုင်း ဒေသကြီး ဒဂုံ (မြောက်ပိုင်း)မြို့နယ် ပန်းရောင်ဆား ထုတ်လုပ် ရောင်းချသူ ဒေါ်မြင့်မြင့်ရီထံမှ သိရသည်။

-

ပန်းရောင်ဆားသည် ကမ္ဘာ့အသန့်ရှင်းဆုံးဆားဖြစ်ပြီး ကျန်းမာရေးနှင့် ညီညွတ်သည့်အတွက် ပြည်ပနိုင်ငံများ၌ လွန်ခဲ့သည့် ၁ဝ နှစ် ကျော်ကတည်းက စတင်သုံးစွဲခဲ့ကြပြီး ပြည်တွင်း၌ ပြီးခဲ့ သည့် နှစ်နှစ်ခန့်က အမေရိကန် ပြည်ထောင်စုမှ စတင် တင်သွင်း အသုံးပြုခဲ့သည်။

-

ယခုနှစ်တွင် ပြည်တွင်းလုပ်ငန်းရှင်တစ်ဦးက ကုန်ကြမ်းဖြစ်သည့် ပန်းရောင်ကျောက်ကို ပါကစ္စ တန်နိုင်ငံမှ မှာယူကာ ထုတ်လုပ် ဖြန့်ချိလျက်ရှိသောကြောင့် လတ်တလောတွင် ပြည်တွင်း သုံးစွဲသူ များပြားလာခဲ့သည်။

-

''အိမ်သုံးဆားနေရာမှာ အစားထိုးအသုံးပြုလို့ရတယ်။ အူလမ်းကြောင်းရှင်းချင်ရင် နံနက်ခင်း အိပ်ရာနိုးတာနဲ့ ဖျော်သောက်လို့ရတယ်။ အသက်ရှူလမ်းကြောင်းနဲ့ အဆုတ်ကို အားကောင်း စေတယ်။ အစာချေစနစ်ကို အထောက်အကူ ဖြစ်စေတဲ့အပြင် နှစ်ခြိုက်စွာ အိပ်ပျော်နိုင်စွမ်း ရှိပါတယ်''ဟု ဒေါ်မြင့်မြင့်ရီကပြောသည်။

-

ပြည်တွင်း၌ ၄၅ဝ ဂရမ် ပန်းရောင် ဆားတစ်ထုပ်လျှင် ငွေကျပ် ၃၅ဝဝ နှင့် ၉ဝဝ ဂရမ် တစ်ထုပ် လျှင် ငွေကျပ် ၆၅ဝဝ ဖြင့် ဝယ်ယူသုံးစွဲ နိုင်ပြီဖြစ်ကြောင်း၊ အရည်အသွေး တူညီသော်လည်း သယ်ယူစရိတ် ကွာဟမှုကြောင့် ပြည်ပမှတင်သွင်း ရောင်းချနေသည့် ပန်းရောင်ဆား ၅ဝဝ ဂရမ် တစ်ထုပ်လျှင် ငွေကျပ် ၆၅ဝဝ ရှိကြောင်း သိရသည်။ ပြည်ပနိုင်ငံများ၏ သုတေသနပြု တွေ့ရှိချက် များအရ ပန်းရောင်ဆားတွင် ခန္ဓာကိုယ်အတွက် လိုအပ်သည့် ဓာတ် ၈၄ မျိုးပါ ဝင်ပြီး ဆီးချို၊ သွေးတိုး၊ ကျောက်ကပ်၊ အဝလွန်ခြင်း၊ အရိုးပွခြင်း တို့သာမက ရောဂါတချို့ကိုပါ ကာကွယ်ပေး နိုင်စွမ်းရှိကြောင်း သိရသည်။ 

-

#မြ၀တီနေ့စဉ်သတင်းစာ