မြောင် ၃၀-၅-၂၀၁၇
မြောင်မြို့နယ် ဧရာဝတီမြစ်ကမ်းဘေးတွင် တည်ရှိသည့် သာထွန်းကျေးရွာ၊ အညွန့်ကျေးရွာ၊ အိုင်သာကျေးရွာ၊ မင်းတန်းကျေးရွာ စသည့် ကျေးရွာများမှ တောင်သူများ၏ ယာမြေများသည် မြစ်ကြောင်း ပြောင်းလဲပြီး မြစ်ရေ တိုက်စားကာ ပျက်စီးဆုံးရှုံးမှု များပြားနေကြောင်း ဒေသခံများထံမှ သိရသည်။
ဧရာဝတီမြစ်ရေ တိုက်စားမှုသည် လွန်ခဲ့သော ငါးနှစ်ကတည်းက သိသာစွာဖြစ်ပေါ်လာ ခြင်းဖြစ်ရာ ငါးနှစ်တာကာလအတွင်း ဒေသခံတောင်သူအများစု၏ ယာမြေဧက ၃ဝဝဝကျော် မြစ်ရေတိုက်စားသည့် ထဲပါသွားပြီးဖြစ်ကြောင်း ဒေသခံတောင်သူများ၏ ပြောပြချက်အရ သိသည်။
ထို့ပြင် ကျေးလက်ဒေသ ဖွံ့ဖြိုးရေးအတွက် ဖောက်လုပ်ထားသော အညွန့်ကျေးရွာနှင့် သာထွန်းကျေးရွာကြား မြေသားလမ်းမှာလည်း ကမ်းပါးပဲ့ကျနေသည့် အတွက် ဒေသခံများ၏ သွားလာမှု၊ လမ်းပန်းဆက်သွယ်ရေး အခက်အခဲ ကြုံတွေ့နေရကြောင်း သိရသည်။
''ဧရာဝတီမြစ်ရေတိုက်စားပြီး ကမ်းပါးပြိုတာခံရတဲ့အတွက် ကျွန်တော်တို့လို တောင်သူတွေ အများစုအနေနဲ့ မြေယာမဲ့တွေဖြစ်လာပြီး စားဝတ်နေရေးကလဲ ပိုမိုပြီး ခက်ခဲလာပါတယ်။ ကမ်းပါးပြိုတဲ့ကိစ္စ နဲ့ပတ်သက်ပြီး သက်ဆိုင်ရာ ကို တင်ပြတာတွေရှိတယ်လို့ ကြားပေမယ့် ဌာနဆိုင်ရာ တွေအနေနဲ့ လုပ်ဆောင်ပေးတာမျိုး မရှိသေးပါဘူး''ဟု ဒေသခံတောင်သူတစ်ဦးက ပြောပြသည်။
ဧရာဝတီမြစ်ရေ တိုက်စားခြင်းကိစ္စကို သက်ဆိုင်ရာသို့ တင်ပြခြင်းများလုပ်ဆောင် နေစဉ်မှာပင် မြစ်ရေမှာလည်း ထပ်ခါတလဲလဲတိုက်စား နေသောကြောင့် ဒေသခံအများစုက ထိရောက်သော ကမ်းပြိုကာကွယ်ရေး လုပ်ငန်းများ ဆောင်ရွက်နိုင်ရန် ပညာရှင်များပါသည့် သက်ဆိုင်ရာ အစိုးရတာဝန်ရှိသူ များအနေဖြင့် အမြန်ဆောင်ရွက် ပေးရေးကိုသာ လိုလားနေကြောင်း သိရသည်။
ဧရာဝတီမြစ်ရေ တိုက်စားမှုကို အချိန်မီ မကာကွယ်နိုင်လျှင် သာထွန်းကျေးရွာပါ မြစ်ရေတိုက်စား ခံရမည့်အခြေအနေတွင် ရှိနေပြီး လက်ရှိတွင် သာထွန်းကျေးရွာ မူလတန်းကျောင်းနှင့် မြစ်ရေတိုက်စားခံရသော ကမ်းပါးမှာ ပေ ၁ဝဝကျော်သာ ကွာဝေးတော့ကြောင်း သိရသည်။
#Yadanarpondaily
No comments:
Post a Comment