ပါမောက္ခ ဒေါက်တာ ခင်ဖြူပြာ
သန့်ရှင်းသော လေသည် ကျန်းမာရေး အတွက် ကောင်းသည် ဆိုသည့် အချက်သည် ကမ္ဘာဦး ကတည်းက လူသားအားလုံး လက်ခံထားပြီး ဖြစ်သည်။ မြန်မာပြည်တွင် နာတာရှည် အဆုတ်ရောဂါ ဝေဒနာရှင် များသည် လေကောင်း လေသန့်ကို ရှူခြင်းဖြင့် ၄င်းတို့၏ ရောဂါကို ပျောက်ကင်း စေသည်ဟု ယုံကြည်ကြ သဖြင့် လေကောင်း လေသန့် ရသည့် နေရာများ ဖြစ်သည့် ငပလီကမ်းခြေ၊ ကလော၊ ပြင်ဦးလွင် စသည့် တောင်ပေါ်ဒေသ တို့တွင် သွားရောက် နေထိုင်လေ့ ရှိသည်။ နာမည်ကျော် စာရေး ဆရာမကြီး ဒေါ်ခင်နှင်းယု ၏ ဝတ္ထုထဲမှ ဇာတ်ကောင်သည် ၄င်း၏ တီဘီရောဂါကို ကုသရန်အတွက် ငပလီကမ်းခြေ သို့ သွားရောက်၍ ကုသမှု ခံယူသည်ကို စာဖတ်သူ အားလုံးသိပြီး ဖြစ်သည်။
ကျွန်ုပ်တို့သည် မော်တော်ကားများ ရှုပ်ထွေးသည့် မြို့လယ်ခေါင်တွင် လမ်းလျှောက်သည့် အခါ ချောင်းဆိုးခြင်း၊ အာခေါင်ယားခြင်း၊ ခေါင်းမူးခြင်း၊ ရင်ကျပ်ခြင်း တို့ကို ခံစားဖူးကြ ပါလိမ့်မည်။ အသက်ရှူ ရုတ်တရက် ကျပ်ပြီး မူးမေ့လဲ သွားသည် အထိပင် ခံစားဖူးသူများ ရှိပေလိမ့်မည်။ ဤသို့ ညစ်ညမ်းသော လေကို ကာလ ကြာရှည်စွာ ရှူမည်ဆိုလျှင် ကျွန်ုပ်တို့၏ အဆုတ်များလည်း ပိုမိုပျက်စီးမည် ဖြစ်သည်။ ဤကဲ့သို့ ပြင်ပလေထု ညစ်ညမ်း ခြင်းသည် ပြည်သူလူထု အများအပြားကို အနှေးနှင့် အမြန် ဆိုသလို ဒုက္ခရောက် စေနိုင်ပါသည်။ ဆောင်းအခါ မီးသွေးမီးဖို လှုံခြင်း သည် အိမ်အတွင်း လေထု ညစ်ညမ်းခြင်း ဖြစ်စေပြီး အသက်အန္တရာယ် ဆုံးရှုံးမှုကို ဖြစ်စေပါသည်။
မြို့ပြ တည်ထောင်သည့် စီမံကိန်း များကြောင့် ကျွန်ုပ်တို့၏ ပတ်ဝန်းကျင် လေထုညစ်ညမ်းမှု ပိုမိုဖြစ်ပေါ် စေပါသည်။ ကျွန်ုပ်တို့၏ စိမ်းလန်းသစ်တော များသည် လေထု သန့်ရှင်းမှုကို စွမ်းဆောင်ပေး ပါသည်။ လမ်း၊ တံတား ဆောက်လုပ်ခြင်း နှင့် စက်ရုံ တည်ခြင်း များသည် ဤစိမ်းလန်းသော သစ်တောများ ကို ပြုန်းတီး စေပါသည်။
ယခုခေတ်တွင် လူဦးရေ ပိုမိုများပြား လာသောကြောင့် လမ်းပန်း ဆက်သွယ်ရေး အတွက် မော်တော်ကားများ ပိုမိုများလာပြီး ၄င်းတို့မှ ထွက်သည့် မီးခိုးလုံးများသည် ကျန်းမာရေး အတွက် ဆိုးကျိုးကို ဖြစ်စေပါသည်။ စက်ရုံများမှ ထွက်သည့် မီးခိုးများနှင့် အညစ်အကြေးများ၊ မိမိအိမ်တွင် အသုံးပြုသည့် ထင်း၊ မီးသွေး၊ ဓာတ်ငွေ့မီးဖိုမှ ထွက်သည့် မီးခိုးများသည် လေထုကို ညစ်ညမ်း စေပါသည်။ သင့် ပတ်ဝန်းကျင်တွင် လေထု ညစ်ညမ်းမှု မည်မျှလောက် ဆိုးရွား နေသည်ကို လေ့လာမိ ပါသလား။
ကမ္ဘာ့ကျန်းမာရေး အဖွဲ့သည် လေထု ညစ်ညမ်းမှုကို ခေတ်မီ စက်ကိရိယာ များဖြင့် အာကာသတွင် လည်းကောင်း၊ ကမ္ဘာမြေကြီး ပေါ်တွင် လည်းကောင်း တောရော မြို့ပါ နေရာ ၃ဝဝဝ ကျော် ထားရှိ၍ တိုင်းတာခဲ့ ပါသည်။
ယမန်နေ့က ကမ္ဘာ့ ကျန်းမာရေး အဖွဲ့၏ သတင်း ထုတ်ပြန်ချက် အရ ကမ္ဘာ့လူဦးရေ ၏ ၉၂ ရာခိုင်နှုန်း သည် ညစ်ညမ်းသော လေထုနှင့် ထိတွေ့ နေသည်ကို တွေ့ရှိရ ပါသည်။ ထိုသို့ဆိုလျှင် ဤ ၉ဝ ရာခိုင်နှုန်း ကျော်သော ကမ္ဘာ့လူထု သည် အသက်ရှူ လမ်းကြောင်း ဆိုင်ရာရောဂါ ဝေဒနာများကို အနှေးနှင့် အမြန် ဆိုသလို ခံစားရမည် ဖြစ်သည်။
ထို့ပြင် တစ်နှစ်လျှင် လူသုံးသန်းကျော် သေဆုံးမှုသည် ပြင်ပလေထု ညစ်ညမ်းခြင်းနှင့် ဆက်စပ်နေကြောင်း ကမ္ဘာ့ကျန်းမာရေး အဖွဲ့က သတင်းထုတ်ပြန် ထားသည်။ ၂ဝ၁၂ ခုနှစ် ကိန်းဂဏန်း များအရ လူဦးရေ ခြောက်သန်းကျော် (အိမ်တွင်း၊ အိမ်ပြင် လေထု ညစ်ညမ်းခြင်း) သေဆုံးခြင်းသည် လေထု ညစ်ညမ်းခြင်း နှင့် ဆက်စပ် နေကြောင်း သိရှိရသည်။ ဤ လေထု ညစ်ညမ်းခြင်းနှင့် ဆက်နွှယ်သည့် သေဆုံးမှု ၉ဝ ရာခိုင်နှုန်းသည် ဖွံ့ဖြိုးဆဲ နိုင်ငံများတွင် ဖြစ်ကြောင်း တွေ့ရှိရပါသည်။ လေထု ညစ်ညမ်းခြင်း ဆိုင်ရာ လေထု ညစ်ညမ်းခြင်းနှင့် ဆက်နွှယ်နေသည့် ရောဂါများမှာ နှလုံးရောဂါ၊ လေဖြတ်ခြင်း၊ အဆုတ်ရောဂါ၊ အဆုတ်ကင်ဆာ များဖြစ်သည်။
ကျွန်ုပ်တို့၏ လေထု ညစ်ညမ်းခြင်းကို မည်သို့ဖြေရှင်းကြ မည်နည်း။ မော်တော်ကား စီးရေကို အများသုံး သယ်ယူပို့ဆောင်ရေး စနစ် လုပ်ဆောင် ပေးခြင်းဖြင့် ဖြေရှင်းနိုင်ပါသည်။ တစ်ဦးချင်း မီးဖိုချောင်မှ ညစ်ညမ်းသည့် မီးခိုးထွက်မှု နည်းပါးစေသော စနစ်ကိုလည်း ကြံဆ လုပ်ဆောင်သင့် ပါသည်။ စက်ရုံများမှ ထုတ်သည့်မီးခိုးများ၊ အမှိုက်များ ကိုလည်း နည်းပါးအောင် လုပ်ဆောင်သင့် ပါသည်။ သစ်တောများ ပြုန်းတီးမှု နည်းပါးရေး ကိုလည်း အလေးထား သင့်ပါသည်။
မြ၀တီနေ့စဉ် ၊ စာ(၈)
No comments:
Post a Comment