ရန်ကုန် ၊ ၂၇-၁-၂၀၁၆
မြန်မာနိုင်ငံ သစ်သီးဝလံ၊ ပန်းမန် နှင့် ဟင်းသီးဟင်းရွက် စိုက်ပျိုးထုတ်လုပ် တင်ပို့ရောင်းချ သူများအသင်းမှ ကြီးမှူး၍ အပတ်စဉ် စနေနေ့တိုင်း ဓာတုကင်းလွတ် သစ်သီးဝလံ နှင့် ဟင်းသီးဟင်းရွက် များအား ရောင်းချ ပေးလျက်ရှိရာ လာမည့် မတ်လ ၁၄ ရက်တွင် နှစ်ပတ်လည် ကျရောက်မည် ဖြစ်သဖြင့် နှစ်ပတ်လည် ဈေးရောင်းပွဲ ကျင်းပသွားရန် စီစဉ်ထားကြောင်း သိရသည်။
အဆိုပါ ဈေးရောင်း ပွဲတော်၌ ဓာတုကင်းလွတ် အသီးအနှံများ ရောင်းချခြင်း အပြင် အသိပညာပေး ဟောပြောပွဲနှင့် စာတမ်းဖတ်ပွဲ များကိုလည်း ကျင်းပရန် စီစဉ်ထားကြောင်း သိရသည်။
အဆိုပါ နှစ်ပတ်လည် အခမ်းအနား မှတစ်ဆင့် စားသုံးသူများ နှင့် ရောင်းချသူများ အသိပညာ ပိုမိုရရှိပြီး ဓာတုကင်းလွတ် သီးနှံဈေးကွက် တစ်ခုအဖြစ် ကျယ်ကျယ်ပြန့်ပြန့် လုပ်ဆောင်နိုင်မည် ဖြစ်သည်။
ဓာတုကင်းလွတ် အသီးအနှံများအား တိုးချဲ့ရောင်းချ လာနိုင်ခြင်းဖြင့် စားသုံးသူများ အတွက် ကျန်းမာရေးနှင့် ညီညွတ်သော အစားအစာများကို ရရှိနိုင်မည် ဖြစ်ကြောင်း သိရသည်။
ယင်း ဈေးရောင်းပွဲတော် ၌ ပုံမှန် ရောင်းချနေသူများ အပြင် အနယ်နယ် အရပ်ရပ်မှ စိတ်ပါဝင်စား သူများလည်း ကြိုတင်စာရင်း ပေးသွင်း၍ ပါဝင် ရောင်းချ နိုင်ကြောင်း သိရသည်။
လက်ရှိတွင် ဈေးကွက်အတွင်း ၌ ဓာတုကင်းလွတ် ဟင်းသီးဟင်းရွက် များအပြင် ငါးပိ၊ ငံပြာရည်နှင့် အဆီအနှစ် ပုံစံဖြင့် ဖျော်ရည် သောက်သုံးနိုင်မှု ပုံစံများကိုလည်း ထုတ်လုပ် လာနိုင်ပြီ ဖြစ်ကြောင်း သိရသည်။
မြ၀တီနေ့စဉ် ၊ စာ(၆)
No comments:
Post a Comment