ရန်ကုန် ၊ ၂၉-၇-၂၀၁၅
စားသုံးသူအား ပြန်လည် ထုတ်ပေးသည့် ပြေစာပေါ်တွင် ကျသင့်ငွေ အခွန်တံဆိပ် ကပ်နှိပ်ထားခြင်း မရှိသည့် စားသောက်ဆိုင် များကို အရေးယူရာတွင် စားသောက်ဆိုင် ၇ဝ ကျော် ဒဏ်ငွေရိုက် အရေးယူ ဆောင်ရွက် နိုင်ခဲ့ကြောင်း ပြည်တွင်း အခွန်များ ဦးစီးဌာနမှ ညွှန်ကြားရေးမှူး ဦးကျော်သန့်လွင် က ပြောသည်။
''ပညာပေးကာလ ကျော်လွန်ပြီး တဲ့နောက် ကွင်းဆင်း စစ်ဆေးမှုတွေ ပြုလုပ်တဲ့ အခါမှာ အခွန်တံဆိပ် ကပ်နှိပ်ထားခြင်း မရှိတဲ့ ဆိုင်တွေကို ဒဏ်ငွေတပ် အရေးယူခဲ့ ပါတယ်။ တချို့က အခွန်တံဆိပ် လုံးဝ ကပ်ထားခြင်း မရှိသလို တချို့ကလည်း လျှော့ကပ် ထားတာတွေကို တွေ့ရတယ်။ ဒါကြောင့် စားသုံးသူတွေ အနေနဲ့ ပြေစာ တောင်းခံသင့် ပါတယ်။ ပြေစာပေးမှသာ အခွန်တံဆိပ် ကပ်၊ မကပ်နဲ့ လျှော့ကပ်၊ မကပ် သိရမှာပါ'' ဟု ၄င်းက ပြောသည်။
စားသောက်ဆိုင်များ အနေဖြင့် ရောင်းရငွေကို မမှန်မကန် ကြေညာခြင်း၊ မမှန်ကန်သော စာရင်းရှင်းတမ်း၊ စာရင်းစာအုပ် တင်ပြခြင်းများ ဆောင်ရွက်ပါက ကျသင့်ငွေ အခွန်၏ ၁ဝ ရာခိုင်နှုန်း နှင့်ညီမျှသော ဒဏ်ငွေ ပေးဆောင်ရမည့် အပြင် တရားစွဲ ဆိုခြင်း များကိုပါ ပြုလုပ်သွားမည် ဖြစ်ကြောင်းနှင့် ပြစ်မှု ထင်ရှားပါက ထောင်ဒဏ်၊ ငွေဒဏ်များ ကျခံရမည် ဖြစ်သည်။
ရန်ကုန်တိုင်း ဒေသကြီး အတွင်းရှိ စားသောက်ဆိုင် များတွင်၂ဝ၁၄ ခုနှစ် နိုဝင်ဘာ ၁ ရက်မှ စတင်ခဲ့ပြီး ပညာပေး ကာလကျော် လွန်ပြီးသည့် နောက်ပိုင်းမှ စ၍ အရေးယူခြင်းများ ဆောင်ရွက်ခဲ့ရာ နာမည်ကြီး စားသောက် ဆိုင်များ အပါအဝင် စားသောက် ဆိုင်ပေါင်း ၇ဝ ကျော်ကိုလည်း ဒဏ်ငွေတပ် အရေးယူ ထားပြီး ဆက်လက် စစ်ဆေး အရေးယူခြင်းများ ဆောင်ရွက် သွားမည် ဖြစ်ကြောင်း သိရသည်။
ယခင်က စားသောက်ဆိုင် များသည် သက်ဆိုင်ရာ မြို့နယ်အခွန် ဦးစီးဌာနမှူးရုံး များ၏ တံဆိပ်တုံး ရိုက်နှိပ် ထားသည့် ပြေစာများကို အသုံးပြုခဲ့သည်။ ပြေစာများ ပေါ်တွင် အခွန် အမှတ်တံဆိပ် ကပ်နှိပ် ပေးခြင်းကို ပြုလုပ်ရသည့် ရည်ရွယ်ချက်မှာ စားသုံးသူ အနေဖြင့် မိမိတို့ စားသုံးမှုအပေါ် ပေးဆောင် ခဲ့သည့် ကုန်သွယ် လုပ်ငန်းခွန် များကို ပြည်တွင်း အခွန်များ ဦးစီးဌာန၏ ကိုယ်စား ကောက်ခံပေး နေသည့် စားသောက်ဆိုင် လုပ်ငန်းရှင်များ အနေဖြင့် နိုင်ငံတော်သို့ အပြည့်အဝ ပေးသွင်းပြီး ဖြစ်ကြောင်းကို ပေါ်လွင် စေလိုသောကြောင့် စားသုံးသူများ ထံမှ ကောက်ခံ ထားသည့် အခွန်ငွေနှင့် ညီမျှသည့် အမှတ်တံဆိပ် များကို ပြေစာများ ပေါ်တွင် ကပ်နှိပ်ပေးခြင်း ဖြစ်ကြောင်း သိရသည်။
ချမ်းချမ်းကို
မြ၀တီနေ့စဉ် ၊ စာ(၃)
#Themyawadydaily
No comments:
Post a Comment