ရန်ကုန် ၊ ၁၆-၆-၂ဝ၁၅
အမေရိကန် နိုင်ငံရှိ ခရီးသွား လုပ်ငန်း အေဂျင်စီများတွင် ကောက်ယူခဲ့သည့် စစ်တမ်းများ အရ ကမ္ဘာပေါ်ရှိ သွားရောက် လည်ပတ်ရန် အကောင်းဆုံး နိုင်ငံများ စာရင်းတွင် မြန်မာနိုင်ငံသည် နှစ်နှစ် ဆက်တိုက် ထိပ်ဆုံးနေရာ၌ ရပ်တည် နေကြောင်း မြန်မာနိုင်ငံ ခရီးသွား လုပ်ငန်းရှင်များ အသင်းမှ သိရသည်။
အမေရိကန် ခရီးသွား အော်ပရေတာ အသင်း အနေဖြင့် အဆိုပါ စစ်တမ်းကို ၂ဝ၁၃ ခုနှစ်နှင့် ၂ဝ၁၄ ခုနှစ်တို့တွင် ခရီးသည်များ စိတ်ဝင်စားမှု အရှိဆုံး ခရီးစဉ် ဒေသများနှင့် ခရီးစဉ် ရောင်းချမှု အများဆုံး နိုင်ငံများ စာရင်းကို တစ်နှစ်ပတ်လုံး ကောက်ယူခဲ့ခြင်း ဖြစ်ရာ ယခုနှစ် တွင်လည်း မြန်မာနိုင်ငံ သည် ထိပ်ဆုံးမှ ရပ်တည် နေကြောင်း သိရသည်။
''အမေရိကန် နိုင်ငံတစ်ဝန်း က ခရီးသွား အေဂျင်စီတွေကို စစ်တမ်း ကောက်ယူခဲ့တဲ့ အခါ ခရီးသည်တွေ သွားဖို့ စိတ်ဝင်စားမှု အများဆုံးနဲ့ ခရီးစဉ် ရောင်းချမှု အများဆုံးထဲမှာ မြန်မာနိုင်ငံက ထိပ်ဆုံးမှာ နှစ်နှစ် ဆက်တိုက် ရပ်တည် နေပါတယ်'' ဟု မြန်မာနိုင်ငံ ခရီးသွား လုပ်ငန်းရှင်များ အသင်းမှ တာဝန်ရှိသူ တစ်ဦးက ပြောသည်။
ကမ္ဘာ့ခရီးသွား လုပ်ငန်းကောင်စီ (World Travel & Tourism Council) မှ မြန်မာနိုင်ငံ အပါအဝင် နိုင်ငံပေါင်း ၁၈ဝ ကို လေ့လာ ဆန်းစစ်မှုများ ပြုလုပ်ခဲ့ရာ မြန်မာနိုင်ငံ၏ ခရီးသွားလုပ်ငန်း ကဏ္ဍမှာ ဖွံ့ဖြိုးလာပြီး လာမည့်နှစ် များတွင် ပိုမိုတိုးတက် လာနိုင်ဖွယ် ရှိကြောင်း သုံးသပ်ဖော်ပြ ထားသည်။
ခရီးသွား လုပ်ငန်းမှ နိုင်ငံတော် GDP သို့ တိုက်ရိုက်ဝင်ငွေ စီးဆင်းမှု အခြေအနေတွင် မြန်မာနိုင်ငံသည် ၂ဝ၁၃ ခုနှစ်တွင် အဆင့် (၁ဝ၄) ရှိခဲ့ပြီး ၂ဝ၁၄ ခုနှစ်တွင် အဆင့် (၉၆) သို့ တိုးတက် ရောက်ရှိ ခဲ့ကြောင်း၊ နိုင်ငံတော် GDP သို့ စုစုပေါင်းဝင်ငွေ စီးဆင်းနိုင်မှု အခြေအနေတွင် မြန်မာနိုင်ငံ သည် ၂ဝ၁၃ ခုနှစ်တွင် အဆင့် (၁၁၁) ရှိခဲ့ရာမှ ၂ဝ၁၄ ခုနှစ်တွင် အဆင့် (၉၉) သို့ မြင့်တက် လာခဲ့ကြောင်း သိရသည်။
ခရီးသွား လုပ်ငန်းမှ တိုက်ရိုက် အလုပ်အကိုင် ရရှိမှုတွင် မြန်မာနိုင်ငံ သည် ၂ဝ၁၃ ခုနှစ်တွင် အဆင့် (၄ဝ) တွင်ရှိနေခဲ့ပြီး ၂ဝ၁၄ ခုနှစ်တွင် အဆင့် (၃၁) သို့ ရောက်ရှိခဲ့ကာ စုစုပေါင်း အလုပ်အကိုင် ရရှိမှုသည် ၂ဝ၁၃ ခုနှစ်တွင် အဆင့် (၃၈) ရှိရာမှ ၂ဝ၁၄ ခုနှစ်တွင် အဆင့် (၃၅) သို့ မြင့်တက် လာခဲ့ကြောင်း သိရသည်။
၂၀၁၃ ခုနှစ်တွင် မြန်မာနိုင်ငံသို့ နိုင်ငံခြား ခရီးသွားဧည့်သည် ၂ ဒသမ ဝ၄ သန်းကျော်သာ ဝင်ရောက် ခဲ့သော်လည်း ၂ဝ၁၄ ခုနှစ်တွင် ၃ ဒသမ ဝ၈ သန်း ဝင်ရောက်ခဲ့ပြီး ၂ဝ၁၅ ခုနှစ်မှ ၂ဝ၂၅ ခုနှစ်အထိ ၁ဝ နှစ်တာ ကာလအတွင်း မြန်မာနိုင်ငံ ခရီးသွား လုပ်ငန်းမှ နိုင်ငံ၏ GDP ၊ အလုပ်အကိုင် ရရှိမှုနှင့် ခရီးသွား လုပ်ငန်း ထုတ်ကုန်များမှ ရရှိသည့် ဝင်ငွေများသည် ပိုမိုတိုးတက် လာမည်ဖြစ်ကြောင်း ကမ္ဘာ့ခရီးသွား လုပ်ငန်း ကောင်စီ ၏ သုံးသပ်ချက်များ အရ သိရသည်။ (၄၄၇)
#Themyawadydaily
No comments:
Post a Comment