ရန်ကုန် ၊ ၂၆-၂-၂၀၁၅
ပြည်ထောင်စု သမ္မတ မြန်မာ နိုင်ငံတော် ပိုးသတ်ဆေး မှတ်ပုံတင် အဖွဲ့က ပိုးသတ်ဆေး ၃၈၃ မျိုးကို မှတ်ပုံတင်ခွင့်ပြု ထားပြီးဖြစ်ကြောင်း အဆိုပါအဖွဲ့၏ ထုတ်ပြန် ကြေညာချက်များ အရ သိရသည်။
မြန်မာနိုင်ငံ ပိုးသတ်ဆေး မှတ်ပုံတင် အဖွဲ့အနေနှင့် (၂၄)ကြိမ်မြောက် အစည်းအဝေး တွင် နည်းပညာများ ဆိုင်ရာ စိစစ်မှုများ ပြုလုပ်ခဲ့ပြီး ပိုးသတ်ဆေး အမျိုးအစား ပေါင်း ၃၈၃ မျိုးကို မှတ်ပုံတင် ခွင့်ပြုထားပြီး ဖြစ်ကြောင်း ပြည်ထောင်စု သမ္မတ မြန်မာ နိုင်ငံတော် ပိုးသတ်ဆေး မှတ်ပုံတင် အဖွဲ့က အမိန့် ကြော်ငြာစာ အမှတ် (၁/၂ဝ၁၅)ဖြင့် ထုတ်ပြန်ကြေညာ ခဲ့ခြင်း ဖြစ်သည်။
ထို့ပြင် စမ်းသပ် သုံးစွဲခွင့် မှတ်ပုံတင် ရရှိထားသည့် ပိုးသတ်ဆေးများ အနေဖြင့်လည်း ပိုးသတ်ဆေး ဥပဒေပုဒ်မ - ၂(စ)အရ ပိုးသတ်ဆေး မှတ်ပုံတင်အဖွဲ့ က သတ်မှတ် ပေးထားသည့် နယ်မြေ အတွင်းတွင် ပိုးသတ်ဆေး၏ ထိရောက်မှု ကိုလည်းကောင်း၊ စိုက်ပျိုးရေး စနစ်နှင့် သင့်လျော်သည့် သုံးစွဲမှု နည်းလမ်းများ ကိုလည်းကောင်း၊ စမ်းသပ်ဆောင်ရွက် ပြီးမှသာ ယာယီ သုံးစွဲခွင့် မှတ်ပုံတင် အမျိုးအစားကို ပြန်လည် လျှောက်ထား ကြရမည် ဖြစ်သည်။
ယာယီသုံးစွဲခွင့် မှတ်ပုံတင်နှင့် ပြင်ဆင် မှတ်ပုံတင် အမျိုးအစား ရရှိပြီးသည့် ပိုးသတ်ဆေး များကို ပြည်ပမှ ပြည်တွင်းသို့ တင်သွင်းခွင့် နှင့် ပြည်တွင်းမှ ပြည်ပသို့ တင်ပို့ခွင့်များ နှင့် စပ်လျဉ်း၍ ဥပဒေပုဒ်မ- ၂၃(ဃ) (င)အရ ပိုးသတ်ဆေး မှတ်ပုံတင် အဖွဲ့မှ တင်သွင်းခွင့် ထောက်ခံချက် (Import Erdosement) နှင့် ကုန်သွယ်ရေး ညွှန်ကြားမှု ဦးစီးဌာန ၏ ခွင့်ပြုချက်များ ရယူရန် လိုအပ်မည် ဖြစ်ကြောင်း သိရသည်။
ထို့ပြင် ယာယီသုံးစွဲခွင့် မှတ်ပုံတင် နှင့် ပြင်ဆင်မှတ်ပုံတင် ရရှိပြီးသော ပိုးသတ်ဆေးများ အနေနှင့် ပိုးသတ်ဆေး ဥပဒေပုဒ်မ -၃၄ အရ ၄င်းတို့၏ ထုပ်ပိုးပစ္စည်းများ၊ ဘူးခွံများ၊ ပုံးခွံများ အပေါ်တွင် ပိုးသတ်ဆေး မှတ်ပုံတင် အဖွဲ့၏ အတည်ပြုချက် ရရှိထားသော မြန်မာဘာသာ ပြန်ဆိုထားသည့် အညွှန်းစာသား နှင့် မှတ်ပုံတင် အမှတ်များ ပါရှိမှသာ ရောင်းဝယ် သုံးစွဲခွင့် ရရှိမည် ဖြစ်သည်။
မှတ်ပုံတင်ပြီး ပိုးသတ်ဆေး များကို တင်သွင်း၊ တင်ပို့၊ ရောင်း ဝယ် ဖောက်ကား၊ သိုလှောင်သုံးစွဲ ရာတွင် ပိုးသတ်ဆေး ဥပဒေဆိုင်ရာ လုပ်ထုံး လုပ်နည်းများနှင့် အညီ ဆောင်ရွက်ရမည် ဖြစ်ပြီး ဥပဒေ ပြဋ္ဌာန်းချက်များ၊တားမြစ်ချက် များမှ တစ်ရပ်ရပ်ကို ကျူးလွန် ဖောက်ဖျက်ကြောင်း တွေ့ရှိပါက ပိုးသတ်ဆေး ဥပဒေအရ ထိရောက်စွာ အရေးယူ ခံရမည် ဖြစ်ကြောင်း အမိန့်ကြော်ငြာစာ တွင် ထည့်သွင်း ဖော်ပြထားသည်။
မြန်မာနိုင်ငံ ပိုးသတ်ဆေး အဖွဲ့က မှတ်ပုံတင် ခွင့်ပြုပေးခဲ့သည့် ပိုးသတ်ဆေး ၃၈၃ မျိုး၏ စာရင်း အသေးစိတ်ကို ကူးသန်း ရောင်းဝယ်ရေးနှင့် စားသုံးသူရေးရာ ဦးစီးဌာန လက်အောက်ရှိ နယ်စပ် ကုန်သွယ်ရေး စခန်းများ၌ သွားရောက် ကြည့်ရှုနိုင်ကြောင်း နှင့် Facebook Acccount - https://www.facebook.com/dcca.dcca တွင် ဝင်ရောက်ကြည့်ရှု နိုင်ကြောင်း သိရသည်။ (၃၃၆)
#Yadanarpondaily
#ရတနာပုံနေ့စဉ်
No comments:
Post a Comment