ရန်ကုန် ၊ ၃၀-၁-၂၀၁၅
မြန်မာ့ရိုးရာ မုန့်မျိုးစုံကို စားသုံးရန် သင့်ကြောင်း ထောက်ခံချက် လက်မှတ်များ ရယူ၍ အာရှနိုင်ငံ များနှင့် ဥရောပ နိုင်ငံအချို့ သို့ တင်ပို့ရောင်းချ နိုင်ရန် စီစဉ်လျက် ရှိကြောင်း ဒို့ရိုးရာ စားသောက်ကုန် ထုတ်လုပ်မှု လုပ်ငန်း မှ မြန်မာ့ရိုးရာ စားသောက်ကုန် ထုတ်လုပ် ဖြန့်ချိရေး မန်နေဂျာ ဦးကျော်ကျော်ထွန်း ထံမှ သိရသည်။
ယခုအခါ ပြည်တွင်းရှိ ရိုးရာမုန့်မျိုးစုံ ထုတ်လုပ်သည့် လုပ်ငန်း လုပ်ကိုင်သူ များက မြန်မာ့ရိုးရာ မုန့်မျိုးစုံကို ထုတ်လုပ် ရောင်းချရာတွင် ထုပ်ပိုးမှု ပုံစံများကို ပြောင်းလဲ၍ ရောင်းချ လာသည့်အပြင် ထုတ်လုပ်သည့် ရက်စွဲနှင့် သက်တမ်း ကုန်ဆုံးမည့် ရက်စွဲများ ကိုပါ ထည့်သွင်း ရောင်းချ လာခြင်းကြောင့် စားသုံးသူများ အနေဖြင့် အန္တရာယ် ကင်းရှင်းစွာ ဝယ်ယူစားသုံး နိုင်ပြီး စားသုံးမှု မြင့်တက် လာကြောင်း သိရသည်။
''အရင်က ဆိုရင် ရိုးရာမုန့် တွေရဲ့ ထုပ်ပိုးမှုက ရိုးစင်းတယ်။ ပလတ်စတစ်အိတ် အကြည်တွေနဲ့ ထုပ်တယ်။ စက္ကူအပါး တွေနဲ့ ထုပ်တယ်။ အခု နောက်ပိုင်းမှ ထုပ်ပိုးမှု ပုံစံတွေ ပြောင်းလိုက်တယ်။ အိတ်တွေမှာ တံဆိပ်တွေ ရိုက်တယ်။ အရောင်အသွေး မျိုးစုံနဲ့ ထုတ်တယ်။ အဓိက က အမြင်နဲ့တင် စားသုံးသူ တွေကို ဆွဲဆောင် နိုင်တယ်။ ပြီးတော့ စားသုံးရန် သင့်တဲ့ ထောက်ခံစာ တွေကိုပါ ကပ်နှိပ် ရောင်းလာတယ်။ နောက်တစ်ဆင့် အနေနဲ့ ထုတ်လုပ်မှု ပုံစံတွေ ပြောင်းတာပေါ့။ ထမင်းသုပ် လုပ်စားလို့ ရတဲ့ အသင့်စား အထုပ်တွေ၊ မုန့်ဟင်းခါး အသင့်စား အထုပ်တွေပေါ့။ အဲဒီ အသင့်စား ထုတ်ကုန်တွေက ဒီက စားသုံးသူ တွေအတွက် မဟုတ်ပေမယ့် ပြည်ပရောက် မြန်မာတွေ အတွက် အလွမ်းပြေ စားသုံးကုန် တွေ ဖြစ်ပါတယ် .. '' ဟု မြန်မာ့ရိုးရာ စားသောက်ကုန် ထုတ်လုပ် ဖြန့်ချိရေး မန်နေဂျာ ဦးကျော်ကျော်ထွန်း က ပြောသည်။
ထို့အပြင် အခြားသော ရိုးရာ ထုတ်လုပ်မှု စားသောက်ကုန် များကိုလည်း ထုတ်လုပ်မှု၊ ထုပ်ပိုးမှု ပြင်ဆင်ပြီး စားသုံးရန် သင့်ကြောင်းထောက်ခံချက် လက်မှတ်များ ရယူရန် ပြင်ဆင် နေကြောင်း သိရသည်။ အာရှနိုင်ငံ များသို့ တင်ပို့ ရောင်းချရာ တွင်လည်း မြန်မာလူမျိုး အများဆုံး နေထိုင်သည့် စင်ကာပူနိုင်ငံ၊ မလေးရှား နိုင်ငံနှင့် ထိုင်းနိုင်ငံ အစရှိသည့် နိုင်ငံတို့ကို ဦးစားပေး ဖြန့်ချိသွားမည် ဖြစ်ကြောင်း သိရသည်။
ထို့အပြင် ဥရောပ နိုင်ငံများ တွင်လည်း မြန်မာနိုင်ငံသို့ လာရောက် လည်ပတ်သည့် နိုင်ငံခြား ခရီးသွား ဧည့်သည် အဝင်များသည့် နိုင်ငံတို့သို့ ဖြန့်ချိ သွားမည် ဖြစ်ကြောင်း သိရသည်။
ထက်နေ
#Themyawadydaily
#မြ၀တီနေ့စဉ်
No comments:
Post a Comment