ရန်ကုန် ၊ ၂၉-၁-၂၀၁၅
မြန်မာနိုင်ငံ၏ မြို့ပြ လူဦးရေ သိပ်သည်းဆ မြင့်တက်မှုမှာ အရှေ့အာရှ ဒေသ၌ အင်ဒိုနီးရှား နိုင်ငံပြီး ပါက ဒုတိယ အမြင့်ဆုံးနိုင်ငံ ဖြစ်ကြောင်း ဇန်နဝါရီ ၂၆ ရက်တွင် ကမ္ဘာ့ဘဏ်မှ ထုတ်ပြန် လိုက်သော မြို့ပြဖွံ့ဖြိုးမှု
ဆိုင်ရာ အစီရင်ခံစာ East Asia's Changing Urban Landscape: Measuring a Decade of Spatial Growth တွင် ဖော်ပြချက် အရ သိရသည်။
အဆိုပါ အစီရင်ခံစာကို အရှေ့အာရှ ဒေသဆိုင်ရာ နိုင်ငံများ၌ မြို့ပြ ဧရိယာသို့ ပြောင်းရွှေ့ အခြေချ လာသည့် ဆင်းရဲသူ များကို မြို့ပြ ဖြစ်ထွန်းမှုမှ အကျိုးရရှိရန် ဆောင်ရွက် နိုင်ရေးအတွက် ထုတ်ပြန်ခဲ့ခြင်း ဖြစ်ပြီး ၂ဝဝဝ ပြည့်နှစ်တွင် မြန်မာနိုင်ငံ ၏ မြို့ပြ လူဦးရေ သိပ်သည်းဆမှာ ၁ စတုရန်း ကီလိုမီတာ လျှင် လူဦးရေ ၆၂ဝဝ ရှိခဲ့ရာမှ ၂ဝ၁ဝ ပြည့်နှစ်တွင် လူဦးရေ ၇၅ဝဝ အထိ မြင့်တက်လာပြီး ယင်းမှာ အရှေ့အာရှ ဒေသ၌ ဒုတိယ အမြင့်ဆုံးနှုန်း ဖြစ်ကြောင်း သိရသည်။
အဆိုပါ အစီရင်ခံစာ အရ မြန်မာနိုင်ငံ၏ မြို့ပြ ဧရိယာ၌ နေထိုင်သည့် လူဦးရေ သိပ်သည်းမှုမှာ မြင့်တက် လာသော်လည်း မြို့ပြ ဧရိယာ ချဲ့ထွင်မှုမှာ တစ်နှစ်လျှင် သုည ဒသမ ၈ ရာခိုင်နှုန်းသာ ရှိပြီး ဒေသတွင်း နိုင်ငံများ၌ တိုးတက်မှုနှုန်း အနိမ့်ဆုံး ဖြစ်ကြောင်း သိရသည်။
ရန်ကုန်မြို့တော် သည် မြန်မာနိုင်ငံ၏ အကြီးမားဆုံး မြို့ပြဧရိယာ ဖြစ်ပြီး စီးပွားရေး ဖြစ်လွယ်မှုနှင့် အခြား အခြေခံ အဆောက်အအုံ များမှာ အခြားမြို့ များထက် ပိုမို ကောင်းမွန် သောကြောင့် လူဦးရေ လာရောက် စုစည်း၍ သိပ်သည်းခြင်း ဖြစ်ကြောင်း သိရသည်။
ရန်ကုန်မြို့တော် ၏ မြို့ပြ ဧရိယာ ချဲ့ထွင်မှုမှာ ၂ဝဝဝ ပြည့်နှစ်မှ ၂ဝ၁ဝ ပြည့်နှစ်အတွင်း တစ်နှစ်လျှင် သုည ဒသမ ၅ ရာခိုင်နှုန်း တိုးလာပြီး လူဦးရေ မြင့်တက်မှုမှာ တစ်နှစ်လျှင် ၂ ဒသမ ၆ ရာခိုင်နှုန်း ရှိကြောင်း သိရသည်။
မြန်မာနိုင်ငံ၏ မြို့ပြ ဧရိယာတွင်၂ဝဝဝ ပြည့်နှစ်က လူဦးရေ ၄ သန်းကျော်ရှိရာမှ ၂ဝ၁ဝ ပြည့်နှစ်တွင် လူဦးရေ ၆ သန်းကျော် အထိ ပြောင်းရွှေ့ အခြေချ လာကြောင်း သိရသည်။ (၄၄၇)
#Themyawadydaily
#မြ၀တီနေ့စဉ်
No comments:
Post a Comment