စိတ်အလို မလိုက်ကြစေဖို့
လူမှုလောက ၌ ကျင်လည် လျှောက်လှမ်း ကြရာတွင် စိတ်ချမ်းသာမှု ကို ခံစားရယူ ပိုင်ဆိုင်နိုင်ကြ သကဲ့သို့ စိတ် မချမ်းသာ ဖွယ်ရာ ကိစ္စများ ကိုလည်း ကြုံတွေ့ ခံစားကြ ရမည် ဖြစ်သည်။ လူတို့၏ စိတ်ဆန္ဒအရ စိတ်ဆင်းရဲ ခြင်းကို မခံစားနိုင်၊ လိုချင်တပ်မက် စိတ်များ လာလျှင် စိတ်ဖိစီးမှု များလာလျှင် စိတ်ကျရောဂါ များပင် စွဲကပ် တတ်သည်။
ထိုမှ စိတ်၏ စေစားရာ အတိုင်း လိုက်ကကြ ရသည်။ စိတ်ဟူသည် လူ့ဘဝ၏ ထွက်ပေါက်ဟု ဆိုထားရာ စိတ်ထွက်ပေါက် ရှာရာတွင် လူတစ်ဦးနှင့် တစ်ဦး မတူကွဲပြား ကြသည်ကို တွေ့ရမည် ဖြစ်သည်။
လူ အမျိုးမျိုး စိတ် အထွေထွေ ဖြင့် ဘဝကို ကျင်လည် ကြရာတွင် လူကြီးများမှာ မိမိတို့၏ စိတ်ခံစား မှုကို ဖြေသိမ့်နိုင်စွမ်း မရှိသော်လည်း ကလေးများ မှာမူ စိတ်၏ စေလိုရာ အတိုင်း ခံစား တတ်ကြသည်။ လိုချင်တာ မရလျှင် စိတ်ကောက်၊ စိတ်ဆိုးတတ် ကြသည်။
စိတ်အလို မလိုက်မိ ကြဖို့ အထူး လိုအပ်သည်။ စိတ်အလို လိုက်မိပါက အမှား ကျူးလွန်မိ ကြပေ လိမ့်မည်။ လူတိုင်း အမှားနှင့် မကင်းနိုင် ကြဘဲ အမှား နည်းတာနှင့် များတာ ကွာခြားမည် ဖြစ်သည်။ လူ့အလို နတ်မလိုက် နိုင် ဆိုသကဲ့သို့ လူတို့၏ စိတ်သည် အမြဲ ဖောက်လွဲ ဖောက်ပြန် ဖြစ်တတ်သည်။ အထူးသဖြင့် ကလေးငယ် များကို ထိန်းကျောင်း သွန်သင် ဆုံးမရာတွင် ကလေးငယ်၏ လိုချင် တပ်မက်သည့် စိတ်ကို အလို မလိုက်မိ ကြစေရန် အထူး လိုအပ်လှ ပေသည်။ အလိုလိုက် အကြိုက်ဆောင် လွန်းပါက အမိုက်ဆောင် သည့် ဘဝသို့ ရောက်ရ သူများလည်း ရှိသည်။
မိဘဟူသည် သားသမီး များ၏ စိတ်ကို အလိုလိုက် အကြိုက်ဆောင် တတ်ကြသည်။ သားသမီး များ၏ မျက်နှာ အညှိုးမခံကြ၊ သားသမီး၏ အလိုကို ဖြည့်ဆည်း ပေးတတ် ကြသည်။ အလိုလိုက် အကြိုက်ဆောင် လွန်းလေလေ သားသမီး များ၏ ဘဝကို အမိုက်တွင်း ထဲသို့ ပို့ပေးရာ ရောက်လေလေ ဖြစ်တတ်သည်။ လူ့စိတ်ဟူသည် ဆားငန်ရေ သောက်ရသည့် အလား သောက်လေ သောက်လေ ငတ်မပြေ ဖြစ်သကဲ့သို့ လူတို့၏ လိုချင်တပ်မက် စိတ်သည် အတောမသတ် နိုင်ပေ။
ယနေ့ အချိန်အခါ တွင် လိုချင် ရမ္မက်ခိုး များဖြင့် ပြည့်နှက် နေသည့် လူအများအပြား ရှိလာသည်။ မိမိတို့၏ အကျိုးစီးပွား တစ်ခုတည်း ကိုသာကြည့်ကာ လူမှု အသိုင်းအဝိုင်း ကြားတွင် နေရာ ယူလာကြ သည်။ လောဘ၊ ဒေါသ၊ မောဟများ မိမိတို့၏ အတ္တစိတ် နောက်သို့ မရောက်စေရန် သတိပြု ကြရမည် ဖြစ်သည်။
သို့ဖြစ်ရာ လူ့ဘဝတွင် လူချမ်းသာ ဖို့ထက် စိတ်ချမ်းသာ ဖို့ကသာ အဓိက အရေးကြီး သည်ဟု ဆိုထားရာ စိတ်ပျော်ရွှင် နိုင်ရန်မှာ ရွှေဖြုန်း၊ ငွေဖြုန်း၊ ဒုစရိုက် လုပ်ငန်းများ အပေါ် မွေ့လျော်ခြင်း မျိုးမဟုတ်ဘဲ ဘဝ အစစ်အမှန်ပျော်ရွှင်စရာ များကို ရှာဖွေ၍ ရယူ ပျော်ရွှင်ကြ ရမည် ဖြစ်ပါကြောင်း အကြံပြု ရေးသား လိုက်ရ ပေသည်။
( အယ်ဒီတာ့အာဘော် )
#Yadanarpondaily
#ရတနာပုံနေ့စဉ်
No comments:
Post a Comment