ခိုင်မာသည့် အာဆီယံ အသိုက်အ၀န်း
၁၉၉၇ ခုနှစ် ဒီဇင်ဘာလ က ကွာလာလမ်ပူမြို့ ၌ ကျင်းပခဲ့သည့် ထိပ်သီး အစည်းအဝေး တွင် အာဆီယံ ခေါင်းဆောင်ကြီး များသည် အာဆီယံအား တည်ငြိမ်သော၊ အောင်မြင် ကြွယ်ဝသော ယှဉ်ပြိုင်မှု စွမ်းအား မြင့်မားသော၊ အချိုးညီညီ စီးပွားရေး ဖွံ့ဖြိုး တိုးတက်သော၊ ဆင်းရဲမှု နှင့် လူမှု စီးပွားရေး ကွာခြားမှု နည်းပါးသော ဒေသကြီး ဖြစ်လာရန် အာဆီယံ၏ မျှော်မှန်းချက် ၂ဝ၂ဝ ကို ကြေညာ ခဲ့သည်။
အာဆီယံ စီးပွားရေး အသိုက်အဝန်း ထူထောင်မှုကို အထောက် အကူပြု စေရန် ဦးစားပေး နယ်ပယ်သုံးခု ဖြစ်သည့် ဒေသတွင်း အသေးစား နှင့် အလတ်စား စီးပွားရေး လုပ်ငန်းများ ဖွံ့ဖြိုး တိုးတက်ရေး၊ ပုဂ္ဂလိက ပူးပေါင်း ဆောင်ရွက်မှု တိုးမြှင့်ရေး၊ အာဆီယံနှင့် အာဆီယံ စီးပွားရေး အသိုက်အဝန်း ၏ ၂ဝ၁၅ ခုနှစ်အလွန် စသည့် ဦးစားပေး နယ်ပယ်သုံးခု ကို ယခုနှစ် စီးပွားရေး မဏ္ဍိုင်၏ အဓိက လုပ်ငန်းစဉ် အဖြစ် ရွေးချယ် အတည်ပြု အကောင်အထည် ဖော်လျက် ရှိသည်။
၂ဝ၁၃ ခုနှစ်က ကျင်းပခဲ့သည့် အာဆီယံ စီးပွားရေး ဝန်ကြီးများ အစည်းအဝေး နှင့်ဆက်စပ် အစည်းအဝေး များမှ ထွက်ရှိလာသော အဓိက အချက်များတွင် အာဆီယံ စီးပွားရေး အသိုက်အဝန်း ထူထောင်မှုကို စိန်ခေါ်နေသော အချက်များနှင့် အဓိက ပြဿနာများ ဖော်ပြနိုင်ရန် အချက်ကို အမြင်ချင်း ဖလှယ် ဆွေးနွေးခဲ့ ကြသည်။ ထိုအချက်များ ထဲတွင် မေခရို စီးပွားရေး နှင့် ဘဏ္ဍာရေး ဆိုင်ရာ တည်ငြိမ်မှု ရှိစေရေး သဘော တူညီချက်၊ စွမ်းရည် မြှင့်တင်မှု နှင့် ရောင်းလိုအား ကန့်သတ်မှုများ ဖော်ပြရေး၊ အသွင်သဏ္ဌာန် ပြုပြင် ပြောင်းလဲရေး လုပ်ငန်းများ ဖြစ်သည့် နည်းဥပဒေ နှင့် စည်းမျဉ်းများ ချိန်ညှိရေး၊ ကုန်သွယ်ရေး နှင့် ရင်းနှီးမြှုပ်နှံမှု လုပ်ငန်းများ ဖြေလျှော့ရေး နှင့် ပံ့ပိုး ကူညီရေး၊ ရုပ်ဝတ္ထုနှင့် လူ့စွမ်းအား အရင်းအမြစ် ဆိုင်ရာ ရင်းနှီးမြှုပ်နှံမှု များ ပါဝင်သည်။
၂ဝ၁၄ ခုနှစ် သြဂုတ် ၂၅ ရက်၌ နေပြည်တော် ရှိ မြန်မာ အပြည်ပြည် ဆိုင်ရာ ကွန်ဗင်းရှင်း ဗဟိုဌာန-၁ ( MICC-1 ) တွင် ကျင်းပသည့် (၄၆) ကြိမ်မြောက် အာဆီယံ စီးပွားရေး ဝန်ကြီးများ အစည်းအဝေး နှင့် ဆက်စပ် အစည်းအဝေးများ တွင် အသေးစား နှင့် အလတ်စား လုပ်ငန်းများ ဖွံ့ဖြိုးရေး အတွက် ဒေသဆိုင်ရာ ပူးပေါင်း ဆောင်ရွက်ရေး လုပ်ငန်းများ မြှင့်တင်ရန်၊ အခြေခံအဆောက်အအုံ ဖွံ့ဖြိုး တိုးတက်မှု အတွက် အစိုးရ ပုဂ္ဂလိက ပူးပေါင်း ဆောင်ရွက်မှု တိုးမြှင့်ရန် နှင့် ၂ဝ၁၅ အလွန် အာဆီယံ စီးပွားရေး အသိုက်အဝန်း ထူထောင်ရေး အတွက် အရှိန် အဟုန်မြှင့် ဆောင်ရွက်ရန် တို့ကို ဦးတည် ဆွေးနွေး သွားမည် ဖြစ်ကြောင်း သိရသည်။
ထို ဆွေးနွေးချက် များမှ ပူးပေါင်း အဖြေရှာ၍ ယခုနှစ်အာဆီယံ ဆောင်ပုဒ် ဖြစ်သည့် '' ရှေ့သို့တူညီ တက်လှမ်းချီ၊ ငြိမ်းချမ်း ဝေစည် အသိုက်အဝန်းဆီ '' ဟူသည့် ခံယူချက်နှင့် အညီ အာဆီယံ ဒေသကြီးကို ငြိမ်းချမ်း သာယာသည့် အာဆီယံ အသိုက်အဝန်း ဖြစ်စေရန် နှင့် စီးပွားရေး အားဖြင့် ရှင်သန် သွက်လက်သည့် အသိုက်အဝန်း ဖြစ်စေရန် အဖွဲ့ဝင် နိုင်ငံများ အတူလက်တွဲ ကြိုးပမ်း ကြရမည် ဖြစ်သည်။
သို့ဖြစ်ရာ အာဆီယံ အသိုက်အဝန်း ထူထောင်ရမည့် သတ်မှတ်သော နှစ် နီးလာသည်နှင့် အမျှ အာဆီယံ ပေါင်းစည်းမှုကို အရှိန် အဟုန်မြှင့် ဆောင်ရွက်၍ တည်ငြိမ်သော၊ အောင်မြင် ကြွယ်ဝသော၊ ယှဉ်ပြိုင်စွမ်းအား မြင့်မားသော၊ အချိုးညီညီ စီးပွားဖွံ့ဖြိုး တိုးတက်သော၊ ဆင်းရဲမှုနှင့် လူမှု စီးပွားရေး ကွာခြားမှု နည်းပါးသော ဒေသကြီး အဖြစ် ဖော်ဆောင်၍ ခိုင်မာသည့် အာဆီယံ အသိုက်အဝန်းကို ထူထောင် သွားကြရမည် ဖြစ်ပါကြောင်း ရေးသား လိုက်ရ ပေသည်။
( အယ်ဒီတာ့အာဘော် )
#Yadanarpondaily
No comments:
Post a Comment