စက်လေးပါး ပီသုံးလုံး နှင့် ဘ၀အောင်မြင်မှု
အယ်ဒီတာ့အာဘော်
( ၃၀-၁-၂၀၁၄ )
ဤလောက၌ ဥစ္စာစီးပွား ကြီးပွားချမ်းသာ စေသော အကြောင်း တရား များမှာ ဥစ္စာစီးပွား ကြီးပွား စေနိုင်သော အရပ်၌ နေရခြင်း (ပတိ ရူပဒေသဝါသ) ၊ ရှေးက ပြုခဲ့ဖူးသော ကောင်းမှုရှိခြင်း (ပုဗ္ဗေစ ကတပုညတာ) ၊ ပညာရှိ သူတော်ကောင်း တို့ကို အမှီပြု ရခြင်း (သပ္ပုရိသူ ပနိဿယ) တစ်နည်း အားဖြင့် မိတ်ကောင်း ဆွေကောင်း အမှီအခိုကောင်း ရှိခြင်း ၊ မိမိကိုယ်စိတ် နှလုံးကို အကောင်းဆုံး စောင့်ရှောက် ထိန်းသိမ်းခြင်း (အတ္တ သမာပဏီဓိ) ဟူ၍ လေးမျိုး ရှိသည်ကို စာပေကျမ်းဂန် များ၌ စက်လေးပါး ဟု ဖော်ပြထားသည်။
အသက်မွေးမှု စင်ကြယ်သော လုပ်ငန်းဌာန များတွင် တာဝန် ထမ်းဆောင် နေကြသူ အားလုံး ဥစ္စာစီးပွား ကြီးပွား စေနိုင်သော အရပ်၌ နေရသူများ ဖြစ်သည်ဟု မဆိုနိုင် သော်ငြား မိမိလုပ်ငန်းနှင့် သက်ဆိုင်သော အမြင်ရှိပြီး တာဝန် ကျေပွန်မှု အတွက် လက်တွေ့ ဆောင်ရွက်နိုင် ရမည် ( Vision , Mission , Action ) တာဝန် ကျေပွန်မှု အတွက် အားကြိုး မာန်တက် ဆောင်ရွက်ခြင်း ၊ လုပ်ငန်း ကျွမ်းကျင်မှုကို စေတနာနှင့် ပေါင်းစပ် ဆောင်ရွက်ခြင်း ၊ အချင်းချင်း ညှိနှိုင်း၍ လုပ်ငန်း အောင်မြင် တိုးတက်ရေး တီထွင် ကြံဆခြင်း တို့ကို စဉ်ဆက်မပြတ် ဆောင်ရွက် နေရမည် ဖြစ်သည်။
ကုန်ထုတ် လုပ်ငန်း ဖြစ်စေ ၊ ဝန်ဆောင်မှု လုပ်ငန်း ဖြစ်စေ ၊ စည်းစနစ် ရှိသော လုပ်ငန်းကြီး လုပ်ငန်းငယ် တိုင်း၌ လုပ်ငန်းမူဝါဒ ၊ လုပ်ငန်း အခြေခံ သဘောတရား နှင့် လုပ်ငန်းစဉ် ( Policy , Principle and Procedure ) များ တိကျစွာ သတ်မှတ်ထားပြီး ခိုင်ခိုင်မြဲမြဲ စွဲကိုင် ထားကြသည်။ ပညာရှင် များ၏ အဆိုအရ လုပ်ငန်းတိုင်း ပီသုံးလုံး ရှိရမည်ဟု ယူဆကြသည်။ အပြိုင်အဆိုင် များသော ခေတ်သစ်တွင် ဆန်းသစ် တီထွင်မှု လိုအပ်လာချိန် မြေစမ်း ခရမ်းပျိုးသည့် ကာလတို အတွင်း မူလ အခြေခံ သဘောတရား များကို ဖြေလျှော့ ပေးရသည့် သဘာဝ ရှိမည် ဖြစ်သော်လည်း လုပ်ငန်း အရှိန်ရ လာချိန်တွင် မူလ အခြေခံ သဘောတရား များအား လျစ်လျူ မရှုသင့်ပေ။ လုပ်ငန်းတစ်ခု သည် မူလ အခြေခံ သဘောတရား များနှင့် လွတ်ကင်း နေသော် လုပ်ငန်း တာဝန်အပေါ် အလေးအနက် မထားသူများ အတွက် အခွင့်ကောင်း ဖြစ်ကာ လုပ်ငန်း အရည်အသွေး ကျဆင်း သွားမည် ဖြစ်သည်။
ပြော၍ မနာခံသူ ငါးဦးတွင် သဒ္ဓါတရား မရှိသူကို ရှိရန်ပြော၍ မနာခံ ၊ အကြားအမြင် မရှိသူကို ရှိရန်ပြော၍ မနာခံ ၊ ပေးကမ်း စွန့်ကြဲခြင်း မရှိသူကို ပေးရန် ပြော၍ မနာခံ ၊ ပညာမဲ့သူကို ပညာရှိအောင် ပြော၍ မနာခံ ၊ သီလ မရှိသူကို သီလစောင့်ရန် ပြော၍ မနာခံသူ တို့ပါဝင်ကြောင်း ပညာ ရှိများ ညွှန်ပြခဲ့ ကြသည်။
ဤ သဘာဝအရ လုပ်ငန်း တာဝန်အပေါ် အလေးအနက် မထားသူကို အလေးအနက် ထားရန် ပြောသော်လည်း ထူးမခြားနား အခြေအနေ မျိုး တွေ့နိုင်သည်။ ပုံပျက်နေသော လောကကို ပြုပြင်သူ အဖြစ်မခံလို ၍ မိုးခါးရေ သောက်ခြင်း သည် မိမိလုပ်ငန်း တာဝန် မကျေပွန်ရာ ကျပေမည်။ စီးပွားရေး လုပ်ငန်း အားလုံးတို့ အတွက် ဈေးကွက်ကို စားသုံးသူ ( Customer ) က အဆုံးအဖြတ် ပေးခြင်းကြောင့် စားသုံးသူ တို့အား လျစ်လျူရှုခြင်း ဟုလည်း ဆိုနိုင်သည်။
ကြီးပွား ချမ်းသာစေသော အကြောင်းတရား လေးပါး တို့တွင် မိမိ ကိုယ်စိတ် နှလုံးကို အကောင်းဆုံး စောင့်ရှောက် ထိန်းသိမ်းခြင်း သည် အခြေခံ အကျဆုံး ဖြစ်သည်။ ကိုယ်စိတ်နှလုံး အကောင်းဆုံး စောင့်ထိန်းသူ တစ်ဦးအဖို့ ကြီးပွား စေနိုင်သော အရပ်၌ နေရခြင်း ၊ မိတ်ကောင်း ဆွေကောင်း အမှီအခိုကောင်း ရှိခြင်းတို့ ပြည့်စုံနေမည် ဖြစ်သည့်အပြင် မိမိ လုပ်ငန်းနှင့် သက်ဆိုင်သော မူဝါဒ ၊ အခြေခံ သဘောတရား နှင့် လုပ်ငန်း စဉ် တို့ကိုလည်း ခိုင်ခိုင်မြဲမြဲ ကိုင်စွဲထားနိုင် ခြင်းတို့ကြောင့် ဘဝ အောင်မြင်မှု ပန်းတိုင်သို့ မလွဲမသွေ ရောက်ရှိ နိုင်မည် ဖြစ်ပေသည်။ ။
No comments:
Post a Comment